Si raconta chì un lupu nativu d’Antisanti, avìa decisu di campà cum’è i Santi. Di seguità un regime datu da i duttori, d’ùn strangulà più agnelli, ancu menu pastori.
Micca una prumessa di fumadore chì hà la gola macca, prumette d’ùn più fumà è sciccà arba tabacca… Nò… nò… una vera decisione, diffarente di quelle di i candidati in Alezzione…
– Ùn mi làscianu pastori è cani una minuta di riposu ! Parchì ogni tantu mi pigliu un muntonu tignosu… Magnaraghju arba cum’è i cavalli, l’agnelli ùn andaraghju più à tribulalli.
Videndu chì carne più nun mi ne piace, forse tutti mi lasciaranu a pace…
Cusì pinsava Signor’Lupu, nuvellu Santu, ellu chì era sòlitu à ùn riflette tantu.
Appena da la furesta era surtitu, u ventu li soffia un stizzu1 di caprettu arristitu. Siguita a direzzione : venìa da un castellu…
S’avvicina, è vede un pastore chì arristìa un agnellu :
– O lu furdanu : agnellu arristitu… Vinu di Patrimoniu, è caprettu custuditu ! O ch’ellu t’attoschi ! È si magna senza ritardi… È di chì par falli piacè, eiu prumittìu di magnà cardi… Or prumittendu di compie i cardi di ste coste, mi mittìa a Signora Flaflà à daretu, chì l’hà poste…
Santu ùn mi sentu più, diàvulu si pigli i duttori, Ghjesù Cristu m’hà fattu, mi mantènghinu i pastori !
A sera stessa in quellu castellu, ne mancava più di unu à l’appellu…
Muralità
O San Ghjuvan’Battista… Fate chì i nostri diputati
D’agnelli è di capretti, sìanu sempre appruvistati…
Ma, binadite sempre i cardi di ste coste,
Chì, s’elle ùn sò mai state poste,
Ci danu almenu a cunsulazione
Di serve un ghjornu di cullazione,
À noi, Paisani Corsi sfiancati,
Chì, si n’ùn cripemu, hè chì no avemu i sette fiati… •
- Stizzu : fumata, ommagu.