Istatina avemu fattu una bella scuperta.
Balagna hè un gruppu natu in a regione chì li hà datu u so nome, da a vuluntà di Dédé Nobili sparitu in u 2012. Dédé era un attore di u riacquistu ch’hà scrittu per mondu gruppi da A Filetta à Canta u Populu Corsu è a maiò parte di i canti di I Chjami Aghjalesi.
U Celu di Balagna, l’avìa vulsutu cum’un rigalu à a so Balagna nativa, li hà datu un bellìssimu cantu è un gruppu induve uni pochi anu cuntinuatu a strada aperta cù ellu. Pò, d’altre voce sò ghjunte d’altri rughjoni, piglièndusi u nome di Balagna. Eccu perch’è ssu gruppu porta ssu bellu nome. Cù u stessu spìritu, quellu di fà cunnosce a nostra stòria, a nostra cultura, u nostru pòpulu.
S’ellu s’affacca in paese ind’è voi, ùn lu mancate micca, ci truverete un piacè tamantu fendu una spassighjata in core di a nostra stòria è di a nostra cultura. Sò bellìssime voce chì si spòsanu cù maraviglia, canti sacri è pulifunìe, emuzioni forte cum’è U lamentu di Ghjesù, o U mo eroe, mumenti allegri dinù cù belli strumentali à son’di viulini, di ghitara o di pìrula. Sò valori forti chì i pòrtanu è ch’elli spàrghjinu in i so cuncerti, à tempu cionfu in a stòria, mischiu suttile trà tradizione è mudernità induve u pùblicu hè invitatu anch’ellu à cantà. Fàcenu scopre l’universu è u sensu prufondu di a pulifunìa ma dinù sprichji di stòria, cuntendu quella di i so canti. Sò cusì stonde d’amparera, d’emuzioni, di gioia, di spartera, induv’ella resiste è si sbuccia l’ànima corsa.
Face qualchi annu digià ch’elli gìranu a Corsica è oghje a si pròvanu ancu nant’à u Cuntinente. Saranu da quì à pocu in Bordeaux. Pudete dinù scòpreli in u so secondu dischellu, Cantu chì sò induv’elli pàrlanu di i paesi, a vita, a guerra, u focu, l’amore, a ghjuventù…
Sciaccamanate à voi o zitè ! Cuntinuate à sparghje è suminà.
I Membri di u gruppu
Bassa : Thierry Nobili
Seconda : Andria Aitelli, Marcu Andria Castellani
Terza è contra cantu : Ghjuvan’Luigi Nobili, Fabriziu Nobili
Terza è percussioni : Sebastianu Dussol
Ghitara : Marcu Andria Castellani, Andria Aitelli
Viulinu è pivana : Andria Aitelli
Prisentazione : Marcu Andria Castellani
Arrigistramenti è accunciamenti : Cristòfanu MacDaniel.
Da scòpreli
6 di sittembre, Cervioni : Catetrala San Tèramu
8 di sittembre, Algaghjola : Ghjesgia San Ghjorghju
9 di sittembre, Lìsula : ND di a Misericordia
15 di sittembre, Belgudè : San Tumasgiu
17 di sittembre, Pigna : Auditorium
23 di sittembre, Calvi : San Ghjuvan’Battista
26 di sittembre, San Fiurenzu : Catetrala di u Nebbiu