Una vita in cantu, una vita d’incantu, di passione, d’amore di a Corsica, di i Corsi, di ciò chè no simu, di ciò chì ci hà fattu, di ciò chì ci conta. Antone Ciosi hè parte di a nostra vita, sessant’anni quasi ch’ellu ci accumpagna cù a so voce chì pare vene di u sprufondu di l’ànima corsa ! Sputichezza è forza, di e so parulle, ma dinù di ssa voce cusì particulare, à tempu grave è generosa, roca è tènera. À 89 anni, ùn ne finisce più d’òffrela in rigalu à e nostre arrechje. Nant’à a scena dapoi i primi passi di l’anni sessanta, ci hà cusì uffertu quantità impressiunante di serate è di dischi, di veghje è di sparghjera. È ùn hà ancu dì tuttu, ùn hà ancu compiu di sprime ssa passione è ssa voglia di facci risente ciò ch’ellu risente, d’ammentacci e bellezze di a nostra lingua, e purezze è e larghezze di a nostra cultura, i misteri è e ràdiche di a nostra storia.
Oghje, ècculu à francà un antra tappa, già principiata dapoi un pezzu ma ch’ellu hà vulsutu stampà d’un discu novu, u so quarantunèsimu ! Cù « Duetti »*, Antone Ciosi ci dice l’impurtanza di a trasmissione. Forse cuscente di l’immensu tesoru di sperienza è di talentu ch’ellu hà ammansatu, u vole tramandà, u vole sparte è u vole sparghje, à ss’altre generazioni di canterini chì l’anu seguitatu è ch’anu betu à ssa surgente. Tragulinu di u cantu corsu, Antone face rigalu oghje di ssi bellìssimi duetti à sse generazioni culturali ch’anu sbucciatu à longu à tutte ss’annate à corre e strade di a nostr’ìsula è di à spalluzzera, scuntrendu u pùblicu ch’ellu tene caru è à quale à datu tantu.
« Duetti » sò 27 intìtuli scelti è 21 artisti cù quali sparte ssi canti entruti oghje ind’è a nostra memoria pupulare.
Cusì, Felì, Ghjuvan’Lucca Geronimi, Arnaud Giacomoni, Cristòfanu Mondoloni, Doria Ousset, Ghjuvan’Luigi Simonpieri, Lea Antona, Ghjuvan’Carlu Papi, Màssimu Merlandi, Francescu Zito, Ghjuvan’Petru Marcellesi, Ghjuvanni Vincente Servetto, Tao By, Diana Saliceti, Ghjilormu Ferrari, Ghjuvan’Clàudiu Acquaviva, I Muvrini (Ghjuvan’Francescu è Alinu Bernardini, Ghjuvan’Francescu Luciani, Stèfanu Mangiantini), Ghjuvan’Pàulu Poletti, Ànghjula Potentini, Andria Aitelli, Patriccu Fiori… spàrtenu e so voce cù ellu per duetti entruti in a storia di u cantu corsu… Eu sò, Tragulinu, Corsu, Un battellu chì passa, Kalliste, Ci sì tù, Le Prisonnier, I Spartimenti, Ritornu, Sciù Gallò, Ultima strinta, I Stradaghji, L’ombre, U Lamentu di a rena, Casa Antica, Circinellu, Chì fà, u 173, U ritrattu, Pampasgiolu, U matrimoniu, Le dernier des bandits, Ghjaseppu è Lillia, Nostalgia, Le porte-Croix, À l’altru mondu, Quantu sì cambiata… Sò cusì dui dischetti, tesori di cultura è di voce racolte ind’un albomu da scopre è fà scopre. Vi avete da campà !
« Prezziosi duetti, spartuti oghje trà talenti è passione », ci dice u pueta. « Bel cuntentu sò d’avè adunitu intornu à mè ghjente cantarine, dotte di voce spurgulate è dolce, di talenti nuvelli o puru d’artisti di rinoma. Sti canti funu scelti per vìa di a so stòria spùtica in lu mio percorsu… Ci sò quelli amati è aspettati da un pùblicu fidu è dinù quelli appinuccia sminticati ch’eo vurebbi favvi amà quantu eo l’amu. Malgradu u sfilà di a vita, sempre aghju brama di sparte issa pazzìa di u cantu, è sempre tengu in core à mè l’amore di tutti i mei è u ricordu di a ben di Mamma chì mi trasmì u gustu di a puesìa è di u cantà. »
Longa vita ! •
* Prugettu purtatu da Ghjilormu Ciosi è Raphaël Jore d’Okidjo.
