À mumenti ferà ottu mesi ch’ellu hè statu assaltatu ind’u spinu è tichjatu di colpi di manera salvàtica, senza pudè difèndesi, Yvan Colonna. Pò, un sacchettu di plàsticu in faccia, hè statu assuffucatu, sott’à l’ochji di e camerà di a prigiò, durante nove longhe minute. Sò scorse torna duie altre longhe minute da ch’elli si muvèssinu i guardiani per purtali succorsu… Puru s’hè battutu dopu u corciu, chjamava a vita u so core soddu, di ràbbia è di passione, hà luttatu una vintina di ghjorni, ma ci vulìa un miràculu perch’ellu si ne scappessi… A dìcenu i duttori, aldilà di 5 minuti senza ossigena, e cèllule cerebrale si ne mòrenu. Si pò pruvà di mantene un cerbellu vivu calendu a timperatura, ma e cunsequenze sò gravìssime è aldilà di 9 o 10 minuti d’assuffocu e lesioni sò irremediàbile…
Si n’hè mortu Yvan u 21 di marzu, senza pudè riapre l’ochji, senza rivede u so paese, a so machja, e so capre… Puru, era u prigiuneru u più custighjatu di Francia. À longu à i so 19 anni d’incarcerazione à mughjà a so nucenza, à crede in un appaciamentu, li sò pisate tutte e custrinte ch’omu pudìa impòneli. Hà suffertu tuttu, sopratuttu in i primi tempi d’incarcerazione. Trasferitu pedi è mani manittate, fruculatu da cim’à in fondu, una volta, pò duie, trè, quattru u stessu ghjornu, svegliatu in piena notte per sbulicà a so carcera, interdettu di vede u so primu figliolu durante parechji anni, interdettu di riceve vìsite, fora di u so avucatu… Ellu solu sà ciò ch’ellu hà trimatu à longu à tutte st’annate di vita arrubata. Puru, hà suppurtatu senza rivolta, u so cumpurtamentu in prigiò hè statu quellu d’un omu rispunsèvule è degnu. Lighjìa assai, fecìa u sport, s’hè maritatu è hà avutu un antru maschju… Avìa vintu u drittu di pudè gode di a muntagna corsa pè a so vechjaia…
Cumu un « detenutu particularmente signalatu », ch’omu deve tene di manera stretta stretta, hà pussutu esse in presenza d’un antru detenutu particularmente signalatu è periculosu assai da i so malfatti fora è nentru à a prigiò ? Cumu hà pussutu esse assaltatu cù una viulenza strema senza chì nimu ùn interveni allora chì u statutu di DPS cummanda chì i guardiani ùn li cacciessi l’ochji da dossu ? Alain Ferrandi hè statu tambustatu anch’ellu in 2005 cù colpi di boccie d’acciaghju in capu. Èranu privenuti i servizii di a prigiò di u perìculu ch’ellu currìa Yvan. Petru Alessandri è Alinu Ferrandi, i dui ùltimi cundannati detti di u « commandò Erignac », detenuti dapoi 23 anni, sò cundiziunèvuli dapoi u 2017. Ùn hè ne favore nè rigalu, hè a lege francese chì a cummanda. Vale à dì ch’elli ponu benefizià d’un accunciamentu di a so pena di prigiò, à cundizioni d’avè un travagliu, è di vultà a sera per dorme in prigiò. Parechje volte u ghjùdice d’appiecazione di e pene hà decisu a so liberazione, rispettendu u drittu. Ogni volta a Precura hà fattu chjama è impeditu sta liberazione cundiziunale. For’di u drittu, for’di a lege, decisioni di vendetta è disprezzu. Quandu u guvernu francese appiecherà u so drittu ? Quandu ?
Arritti ùn pò stà senza ripètela è ripètela torna. Quasi ottu mesi dopu à l’agressione d’Yvan, s’aspetta sempre ghjustizia è verità. Da ch’ellu possi ripusà in pace. •