L’acqua hè vita è senza acqua ùn si pò campà. Ma l’acqua pò esse morte dinù. L’inundazioni di u 2 è u 3 d’ottobre dopu à a timpesta Alex anu fattu sette morti trà Francia è Italia. Parechji sò spariti torna è s’aspetta à un bilanciu ancu di più tremendu. A timpesta lascia milliardi di disguasti è sciagure. L’Alpe marìttime, u Val d’Aoste è u Piemonte anu liccatu u più. Ind’è a valle di a Roya, sò centinaie di personi sinistrate è incagnate nant’à lochi spianati. Strade tolte, case arruinate, certi anu persu tuttu. Basta à vede e fottò per imaginà a viulenza di l’ore ch’ella hà campatu sta corcia ghjente di pettu à l’acque torrenziale fallate in un lampu. Si parlerà di fiumare eccezziunale, ma e càuse sò pè u più umane, è mondu cunnisciute. 30 % di a pupulazione di l’Alpe Marìttime è di u Vaucluse, chì sò i dipartimenti i più tocchi da ssi timpurali, campa nant’à lochi inundèvuli. A dìcenu l’esperti, a dìcenu puru i funziunarii di u Statu incaricatu di fà rispettà e lege, a ripètenu dapoi anni i difensori di l’ambiente, a dice u sèmplice sumerinu : cresce l’impermeabilisazione di e terre è i lochi pendici, cala dunque a capacità di a terra di bèiesi l’acqua, pè u più cù pavimenti, strade è parcheghji d’astracu ch’impedìscenu l’infiltrazioni. Tandu i fiumicelli, cù e so sponde già assai custruite, ingròssanu d’un colpu, da diventà fiumari, carrighèndusi àrburi, trònculi, è matèrie da tutte e mamme chì danu di più forza torna à l’acque strascinate, sin’à sciappà tuttu nant’à u so parcorsu, scavendu da parechje metri i righi di i fiumi, è purtèndusi cù elle vitture, case è paesi sani. Sse timpeste, scarse ind’i tempi, sò oghje di più in più frequenti cù e cunsequenze di u ciambuttamentu climàticu. È l’omu ùn hè prontu à affruntale, ragiunendu sempre cum’è s’elle èranu fiumare centenarie. Innò, averemu da pate l’elementi tutti l’anni è parechje volte à l’annu. Ghjè più chè ora d’addattà e nostre pulìtiche ! O piuttostu, d’appiecà e nostre pulìtiche ! A presa in contu di u rìsicu d’inundazione o di u rìsicu di summersione, esiste. Basta à rispettala. Basta à ricusà e custruzzioni nant’à u liturale, nant’à i righi di i fiumi, o nant’à i poghji. L’acquate turrenziale cum’è queste quì, sò chjamate episodii mediterrànii, per vìa di i scontri d’aria calda ghjunta da u mare è d’aria fresca ghjunte da u nordu. Falla in qualchi ora ciò chì falla in parechji mesi, è s’anu da multiplicà parechje volte ind’è l’annate sse sciagure. Disgraziosamente e regioni o i dipartimenti i più cuncernati (l’Aude, u Gard, l’Herault, u Var, l’Alpe Marìttime, u Vaucluse…), sò dinù i più pupulati è quelli ch’ùn rispèttanu micca e règule d’urbanìsimu, cù a crèscita di a demugrafìa è di a pressione turìstica. A Corsica dinù hè cuncernata pè u più cù a so piaghja aiaccina. È si paca caru d’ammaestrà male l’urbanisazione. •