Elefanti, felini, scìmie, orsi… l’animali salvàtichi ùn sò micca fatti per girà in tòndulu cù piume è frisgetti. Mèttesi in equillìbriu nant’à u so capu o nant’à e so zampe inferiori, cunduce una bicicletta, saltà in u focu… sè u pùblicu sapìa un suppucciu ciò ch’ella hè a vita di l’animali di cìrculi, è a viulenza ch’elli subìscenu per ghjunghje à rializà ciò ch’omu li dumanda, ùn anderèbbinu più à u cìrculu. Di sicuru, micca tutti i cìrculi viulentèghjenu l’animali, ma per ghjunghje à falli fà certi affare, ci vole à mètteli in cundizioni d’angosce è di sottumissione tremende. Bellu suvente mèttodi gattive sò impiecate per falli ghjunghje à u più in furia à i torni imposti. Chjappi lìberi in a savana, sò cundannati à una vita di tristezza è frastornu, chjosi è stretti, cabbie brutte, da induv’elli sòrtenu solu per fà ciò chì l’omu li dumanda sott’à ciò ch’omu pò chjamà una tortura. Finitu u tempu induv’elli pudìanu corre ind’è a natura, vultulassi nant’à l’erba o a terra, nudà è ghjucà ind’è l’acqua, sente u muscu è i rimori di a ghjàngala… famiti è maltrattati, sòffrenu. L’associi di difesa di l’animali a dinùnzianu, elefanti minati da bastoni cù un ancinu o cù scàriche elèttriche. Felini battuti, strascinati cù catene, orsi strangulati cù cullari è bucchini, battuti cù barre di farru, da falli capisce qual’hè u patrone. Colpi di calzi à e scìmie, minate cù cravascie… Eppò l’animali sò straziati da chjuchi. L’elefantucci è i felini sò cacciati di forza à a so mamma. Sè vo andate à vede l’elefanti nanzu à u spetàculu, daretu à u tendone, incatenati in u so stazzu, è chè vo i vidite manganà da un cantu à l’altru, ùn pensate micca ch’elli bàllanu, o ch’elli si ghjòcanu, innò. Sò in pienu stress, affannati è persi. U solu fattu d’impedìsceli di viaghjà cum’elli a fàcenu ind’è a natura, l’avvilisce. L’elefanti parcòrrenu chilòmetri in libertà, nùdanu, scòprenu lochi, scàmbianu trà d’elli. Tuttu ciò chì face a so vita è u so equillìbriu li hè cacciatu. Dinù i felini. À l’età salvàticu, occùpanu spazii maiò, còrrenu è si ghjòcanu. Imprigiunati, fàcenu u passu è vene in a so cabbia è pèrdenu i so riferimenti. Ancu assai, u mondu evolueghja. Omu s’accorge di a sorte ingrata ch’elli subìscenu, parechji paesi interdìscenu i cìrculi d’animali salvàtichi, cum’è l’Àustria, a Bulivìa, a Finlanda, Singapour, a Sueda… Puru in Francia, esìstenu sempre. Di sittembre scorsu, Nicolas Hulot hà messu in piazza una Cummissione pè u benestà di l’animali, chì deve frà altru interdisce a cattività di l’animali salvàtichi… Ci ghjunghjerà ? In Corsica, u merre di Bastia hà interdettu i cìrculi in a cumuna…
hè dunque pussùibule !
Aspettendu, voi dinù pudete partecipà : ùn andate micca in i cìrculi d’animali. Andate solu in i cìrculi d’artisti d’acrubati è di buffoni. L’omu, ellu, pò fà e so scelte. L’animali innò.
Fabiana Giovannini