Avè un chjerchju di vittura in manu ùn hè cum’è avè un sèmplice arnese per spiazzassi… omu ùn si n’accorge micca ma, a vittura hè un arma furba per sè è per l’altri. Una piuvicinata, un pocu d’oliu, un tufone nant’à a strada, un animale à mezu, una bissicletta o un pedone ch’ùn s’hè vistu dopu à una girata, un antra vittura in faccia chì svìa un pocu à manca… a mìnima petra, un pocu di gravetta, a fatica, u sonnu chì vene senza prevene… è ssa vitturona sciurata, fatta à sacrifizii per cumpràssila, diventa a nostra cascia, o quella d’un antra vìttima nucente… Si viaghja troppu in furia. Basta una seconda. À 60, 80 o 100 chilòmetri à l’ora, omu ùn pò riagisce cum’è s’ellu viaghjava à pedi, eppuru, li si pare di sì ! Basta un nunda eppò l’arnese ùn risponde più o piuttostu và più in fùria chì i nostri òrdini à a mascina. Omu si crede in vittura cum’è in casa soia. Si piglia l’abitùtine, u so futtogliu, u so chjerchju, a so mùsica, i so bombò… avemu e nostre cumudità, ssa strada s’hè fatta centu volte è più, ci si pare di pudè falla ancu l’ochji chjosi eppò… una distrazzione, u telefu- ninu chì sona, un dischettu da chjappà, a ràdio ch’omu vole accende… a strada gira è si fila drittu… basta una seconda… u tempu d’un soffiu di vita… È si lascia a famiglia addulurita, babbu, mamma, figlioli, maritu o moglie, amichi ind’i pienti è l’affanni. Tante vite arrubate! Dapoi u principiu di l’annu, dapoi troppu anni, cusì tanti cari si ne sò andati. Vitezza, alcool, fatica… eppò si ne scappa a vita. In cinque anni, ci sò stati 2225 accidenti stradali in Cismonte (da 2006 à 2011) è 1691 in pumonte… decine di morti, centinaie di feriti… In u mondu, sò circa 1,25 millioni di morti à l’annu è 20 à 50 millioni di feriti. Quantu struppiati?! L’accidenti stradali sò a prima càusa di morte pè i ghjòvanni da 15 à 29 anni. A metà sò i più dèbbuli nant’à a strada, quelli chì viàghjanu à pedi, in mottò o à bissicletta. In certi paesi, ciò ch’elli còstanu l’accidenti stradali raprisenta 3% di u pruduttu naziunale brut, è ancu 5% pè i paesi i più pòveri. A lotta contr’à ssa disgrazia diventa una càusa mundiale. Bisogna di più prevenzione per fà calà ssu disastru umanu. Vitture menu putente, strade intrattenute è più sicure (piste ciclàbile per un dettu), sicurezza (cascu o cinta…), sanzioni forte contr’à l’alcool o a vitezza: un accidente à 50 chilòmetri à l’ora face di menu disguasti chì un accidente à 100 chilòmetri à l’ora. A vitezza arruina dinù a salute in cità, cù a pulluzione di l’ària ch’hè menu forte s’omu viaghja pianu… Bisogna à dà più educazione dinù, da chjuchi, per appruntà l’automobilisti di dumane. L’accidenti stradali sò una calamità pè a vita umana è per l’ecunumìa. Ci vole à mubilizassi tutti, per noi è per l’altri. Andate pianu o ghjente.
Fabiana Giovannini.