U primu nùmeru : a Corsica, a testa mora, u fucile è una zappa

ARRITTI !

Nasce ARRITTI in u principiu di u cumbugliu di u  riacquisu culturale, u sbuccime di l’associi, di i sindicati, di ssa voglia di fà, ss’intusiàsimu frescu è lindu d’una cuscenza chì si disceta è piglia vita, un vulè campà. U primu nùmaru costa 1 francu, cù un disegnu pocu stranu nant’à so Una : una Corsica, a testa mora, un fucile è una zappa… à tempu l’identità, è a terra ch’omu vole travaglià è difende. U ghjurnale si dice « settimanale di difesa di l’interessi ecunòmichi di a Corsica »… eppò « Solu a Corsica è tutta a Corsica » dice torna l’intìtulu !

Cusì, ARRITTI sarà di tutte e lotte di l’affirmazione d’una cuscenza naziunale, campendu i drami è e gioie, accumpagnendu a storia chì si scrive cun ellu. Quand’ellu lampa u so mughju, a lingua corsa hè chjamata « dialettu », disprezzata, interdetta. «Hè difesu di parlà corsu è di sputà in terra », dìcenu i pannelli ind’è e scole isulane. A lingua ùn hà mancu u drittu à a facultatività di a lege Deixonne aperta à tutte l’altre lingue regiunale dapoi u 1951, fora di u corsu ! Ci volerà à bàttesi sin’à u 1972 per avè a pussibilità, ancu noi, d’amparà u corsu à a scola di manera facultativa. I ghjòvani sò cundannati à l’esiliu per stantà u so pane, induv’elli scòprenu a sorte inghjusta fatta à a Corsica. Paragunendu a nostra situazione à quella di i Francesi, ùn capìscenu micca. È digià si fàcenu sente e prime scuppittate a notte… I ghjòvani ùn vòlenu più parte. Vòlenu un università, vòlenu imparà a so lingua, riacquistà a terra, mèttela in valore, ritruvà l’usi antichi, sparghje i sapè fà, rinvivisce i paesi. Ingeniori o duttori mare in dà, vòlenu vultà è fassi artisgiani o pastori in paese di babbu. 50 anni dopu e rièscite di u mondu agrìculu sò quì, appellazioni d’urìgine à buzeffu, nuturietà di u vinu corsu, di l’oliu d’alivu, di u casgiu, di a robba purcina… nucèlulla, castagna, amàndulu, mele, murza… ma dinù biera, wisky è licori da tutte e mamme ! S’hè custruita un indùstria alimentaria è s’hè fattu ancu un nome a cucina corsa ! Mà tuttu ci hè vulsutu à strappalu. Manifestazioni, azzioni, affissi, stampini, cullettivi di difesa sempre ricuminciati per ghjunghje à e mìnime avvanzate… È quantu annate di prigiò, è quantu sangue sparsu… Quante brame è rivendicazioni !

Cinquant’anni dopu, festighjemu à tempu un annu di a presa di rispunsabilità naziunalista à l’Assemblea di Corsica. Chì ne vulemu fà di ssi cinquant’anni ? Chì lezziò ritene ? Simu di pettu à un antra scumessa : fà ! ARRITTI ci chjama à lampà un ochjata in daretu da pudè cuntinuà inseme tamanta strada principiata 50 anni fà. Allora, Femu ! Da lampà torna l’invitu : ARRITTI !

Fabiana Giovannini