Ssu nùmaru speciale mette u lume nant’à i cartulari detti « caldi » di a rientrata. Averemu da scumbatte di sittembre nant’à tutti sti capatoghji è ci tocca à esse sulidarii per dà di pettu à una situazione ch’omu hà paragunatu à una situazione di « guerra ». L’ecunumìa hè affrinata. A crisa ci annega d’incertezze è penseri da tutte e mamme. A sucietà sana hè inchieta di u lindumane. Oltre e cunsequenze sanitarie grave ch’ùn sò ancu per finisce, ci sò e cunsequenze ecunòmiche è veneranu prestu e cunsequenze suciale, pò e cunsequenze sucietale, nate da ssa crisa ecunòmica tremenda. Une poche d’imprese sòffrenu digià. U turìsimu ben intesa è i so settori ultradipendenti, i trasporti è l’agrualimentariu, frà u più quellu chì prumove prudutti nustrali. Ma dinù miriade d’imprese è prufessioni chì ne càmpanu, agricultori, artisgiani, culturali, imprese di a custruzzione, mistieri di a cumunicazione, eccèttera, eccèttera… È si parla pocu di tutta sta ghjente chì danu un colpu di manu à i settori di u turìsimu, studienti, disoccupanti, è tutti quelli chì travàglianu un pocu cù a stagione istatina è chì si tròvanu cù una pèrdita impurtante nant’à i so rivenuti abituali, senza pudè bramà un indennità suciale…
Arritti, amichi lettori, hè un impresa chì soffre di sse cunsequenze secundarie. Frà l’ecunumìe ch’omu ferà in prima, sò l’abbunamenti, à i ghjurnali, à e sale di sport, à i corsi di sustegnu sculare è altre pìccole cose in più di u nostru cutidianu… Veneranu dopu e vacanze accurtate, e surtite à u risturante sminuite, eccèttera. L’imprese taglieranu in priurità nant’à i so bugetti publicitarii, pò e so capacità d’impiecu, o i so scopi di mudernisazione eccèttera. Menu imprese chì si crèanu, o si trasfòrmanu, a sucietà pruverà à mèttesi naturalmente in modu d’attesa, sperendu ghjorni più belli, è campandu nant’à e so riserve.
Arritti campa di sti trè puntelli : l’abbunamenti, e publicità, l’annunzii legali chì dìcenu a vita di l’imprese. È cum’è tutte l’imprese, Arritti hè oghje toccu assai da i primizii di a crisa. Ssu nùmaru d’Arritti a vi dice. D’aostu, a sapete, hè sempre u casu di truvà sustegni publicitarii chì ci danu qualchi ricetta per dà di pettu à a rientrata. Sta volta, u quaternu publicitariu di ssu nùmaru d’Aostu, hè viotu o quasi. E ricette d’annunzii legali è di l’abbunamenti càlanu assai. Noi dinù averemu u bisognu di sustegnu è fraiutu. À tutti dunque vi mandemu una chjama. Aiutàteci à campà. Pagate u vostru abbunamentu. Fate di rigalu à parenti à amichi, un abbunamentu. È sè vo site un impresa, scegliite Arritti pè a publicazione di e vostre annunzii legali o e vostre publicità. Arritti hà campatu tutte l’intrappulate è i tràmpali d’un mezu sèculu di lotte naziunaliste accanite. Hè u primu mughju di u naziunalìsimu corsu mudernu, 54 anni fà, per dì ch’ellu ci tuccava à resiste è à fà rinasce a nostra identità. E lotte pè a salvezza di u nostru pòpulu, di a nostra lingua, di a nostra terra, sò tutte lotte chì u vostru settimanale, amichi lettori, hà purtatu è accumpagnatu senza sfiatà. Ci tocca torna à resiste inseme. Aiutèmuci.