2024… è sò sempre à more e donne marturiate per esse donne. Da quì à un mese, u 25 di nuvembre, serà a Ghjurnata mundiale di e viulenze fatte à e donne. Chì sensu piglia ind’è e nostre sucietà dette civilizate ? Malgratu e ghjurnate cunsacrate, e dinunziazione da tutte e mamme, l’azzioni pulìtiche, ferma sempre in Francia una donna nant’à 10 vìttima di viulenze da u so cumpagnu di vita… Una donna nant’à 10 ! È ghjè u guvernu, puru bellu prudente nant’à u contu annuale macabru, chì a dice. E so statìstiche ùn sò pare à quelle di l’associ, trista cuncurrenza ch’ùn riesce micca à cunvìnceci chì a pulìtica ghjunghje à fà prugressi… U guvernu dà tutti l’anni e so statìstiche cù un annata di ritardu, dopu à l’inchieste per esse sicuru ch’elle sò state assassinate in tantu chè donne, è micca perchè u coppiu s’hè liticatu… Cuntabilizeghja l’inseme di e viulenze fìsiche, psicològiche è ecunòmiche à u senu di u coppiu, ch’ellu sìa spiccatu o nò. Chì dìcenu e so statìstiche ? Una vìttima nant’à quattru hà menu di 25 anni è 89 % di e vìttime sò donne cù i so figlioli. I signalamenti di viulenze contr’à e donne anu duppiatu in cinque anni. Nove volte nant’à 10 sò l’omi i viulenti, è nove volte nant’à 10 sò e donne e vìttime. 97 % di e dumande di prutezzione sò fatte da donne. Eppuru, ci hè solu una donna nant’à quattru à porghje lagnanza, è 80 % di sse lagnanze sò classificate senza sèguita. Vale à dì malgratu u curagiu è u rìsicu di certe à porghje lagnanza, a sucietà ùn a piglia micca in contu. Sò circa 120 donne à more ogni annu à u senu di u so còppiu. U raportu « Induve sò i soldi contr’à e viulenze fatte à e donne ? » resu da a Fundazione di e Donne u 25 di sittembre scorsu dice ch’ellu ci volerebbe 2,6 milliardi d’àuri da pudè luttà contr’à sse viulenze, 1 % di u bugettu di u Statu. Chì sorte averà ssa dumanda cù i 60 milliardi d’ecunumìa ch’ellu brama u Primu ministru Barnier ? In 2022, u bugettu cunsacratu à sse viulenze fatte à e donne era di 184,4 millioni d’àuri… Ramentemu chì solu 60 % di e vìttime di viulenze è 1 % di e vìttime di viulenze sessuale pòrghjenu lagnanza… Ramentemu chì quandu una donna hà u curagiu di parte, li tocca hà custruìscesi un antra vita, truvà un tettu, un travagliu, ricumincià à zeru, senza cuntà l’accumpagnamentu psiculògicu è ghjurìdicu necessariu da pudè ritruvà una dignità. Hè troppu diffìciule. Una donna nant’à sei chì prova à scappà, rivene perchè ùn arriesce micca à urganizassi… È ghjè durante a staccanza chì e viulenze fìsiche è i rìsichi di feminicidiu crèscenu… Ci hè u bisognu d’alloghju d’urgenza. Secondu à un inchieste di a Fundazione di e Donne fatta in 2021, màncanu trà 13.250 è 39.100 piazze d’alloghju d’urgenza ogni annu. I dispusitivi per sustene sse donne esìstenu, ma ci hè bisognu di mezi da ch’elli pòssinu risponde à tutti i bisogni.
Senò… u contu macabru hà da cuntinuà. Dapoi u principiu di l’annata 2024, l’associu NousToutes.org cuntabilizèghja 107 donne assassinate da u so maritu o u so cumpagnu di vita. Èranu 136 in 2023, 147 in 2022, 113 in 2021… L’ùltima vìttima, ssu 12 d’ottobre in Saint-Pantaléon-de-Larche in Corrèze, avìa 39 anni è trè figlioli chjuchi. Dapoi u principiu di l’annata 59 zitelli sò diventati urfanelli di a so mamma assassinata. •