Ssa crisa mundiale sarebbe forse u mezu di ripensà a nostra ecunumìa è l’andature di e nostre sucietà. Ùn hè vera ? Hè pussìbule.
S’hè vista in altrò, è serà ancu più fàciule ind’è noi cù e putenzialità ch’ella hà a Corsica cù a so natura magnìfica, a so meteò, i so sapèfà…
«Quandu a pulìtica face prova di vulintà, tuttu hè pussìbule » dice u ghjurnale Planète. Ci conta cusì a sperienza di Albi à u Sud-Ueste di a Francia.
L’eletti si sò dati cum’è scopu di ghjunghje à l’autunumìa alimentaria… 51.000 abitanti, ùn sò tantu diffìciuli à nutrisce. Cù a messa in ballu di cìrculi corti, Albi s’hè datu trè scopi : riduce l’impattu carbonu di i trasporti di marcanzìa, assicurà a pruvista di a cità in casu di crisa alimentaria, è assicurà a qualità di i prudutti cunsummati. Vale à dì scopi chì vanu inseme, à prò di a salute di a ghjente è di l’ambiente ! Cusì ssa cità classificata à l’Unesco da u so patrimoniu culturale magnìficu, s’hè messa in capu una bella sfida ! 73 èttari di terre in cor’di a cità saranu cumprati da pudè mètteli in manu d’urtulani, à cundizione di pruduce bio è di vende à u mercatu lucale. Sò già 8 èttari chì sò stati messi in valore da à l’agricultori è 7 impiechi sò stati creati ! A cità incuragisce dinù a cultura è a racolta di legumi bio cù a messa in ballu d’orti citatini cù l’associu « Incroyables comestibles ». U scopu di stu muvimentu sulidariu natu in 2008 in Todmorden, in Inghilterra, hè di piantà àrburi à frutti è legumi in u mìnimu cantu di a cità da ch’omu possi truvali in tutti i carrughji è permette à tutt’ugnunu di prufittane, manghjali è pocu à pocu mèttesi à piantali è curali anch’elli !
U muvimentu hè diventatu in furia pupulare.
Tutt’ugnunu si mette à piantà grane è à prutege ss’urtuletti impruvisati. Tordmoden hè diventata a cità a più piacèvule di u Reame Unitu! In Francia, u muvimentu s’hè sparsu in 2011 è sò parechje dapoi e cità hà adupralu. Invece di giardinarie di fiori, avete giardinarie di porri, di carotte o di pumate ! Rispettu di a terra, rispettu di l’umanu, spartera, eccu a filusufìa di stu muvimentu! È Albi l’hà adupratu anch’ellu ! I spazii di verdure sò cunsacrati à sta pràtica è pruposte à tutti quelli chì vòlenu suminà grane! U più diffìciule tandu, spieca u merre, hè di cunvince a grande distribuzione di pruvisiunassi in i pruduttori lucali. Ma in grazia à i riflessi di l’abitenti ch’ùn vòlenu più cumprà prudutti chì vènenu da luntanu, e mentalità càmbianu è pocu à pocu si capisce a scumessa ch’ella prupone a cumuna. U risultatu hè à prò di tutti : si manghja sanu è gustosu, si paca menu caru, si sparte cù u vicinu, hè una bella sfida cullettiva !
Tandu, l’autunumìa alimentaria hà da esse da quì a pocu una realità in Albi !
Fabiana Giovannini.