Hè natu un mostru industriale. U mondu ùn s’accorge ancu di tutte e cunsequenze di ssu matrimuniacciu.
Bayer hè statu fundatu in u 1863. Oghje hè un gigante di l’indùstria chìmica è di spezieria. Hà inventatu l’aspirina. Ma hè cunnisciutu sopratuttu da u fattu chì si cumprava i prigiuneri in Auschwitz durante a seconda guerra mundiale, da ch’elli li ghjòvinu di sperimentazione medicale in i so laburatorii… Hè cusì ch’ellu hà inventatu u gaz Zyklon ch’hè statu utilizatu in e càmere à gaz di i campi di sterminazioni nazì. Bayer hè dinù rispunsèvule di u scàndalu di u sangue cuntaminatu ch’hà cundannatu millaie d’emufilichi cuntaminati da u virus di u sidà. Hè torna Bayer ch’hè statu rispunsèvule di u scàndalu di l’oliu alteratu ch’hà fattu 2000 vìttime, u scàndalu di e pillule cuntrasseptive cù millaie torna di lagnanze, è, infine, u famosu gaucho, insetticidiu fattu da neonicotinoidi, rispunsèvule di a morte di l’ape…
Monsanto hè un antru gigante americanu, spezializatu ind’è l’agru indùstria è a biotecnulugìa. Ghjè a multinaziunale di e sumente, i prudutti fittofarmaceutichi, l’erbicidii, i pesticidii, è i famosi OGM, urganìsimi geneticamente mudificati. Hè statu fundatu in u 1901 per pruduce edulcuranti cum’è a saccharina è l’aspartame. Monsantu hà dinù partecipatu à a ricerca per fabricà a bomba attòmica americana. Pruduce pulistirene, PCB è prudutti più periculosi torna, cum’è u famosu « agent Orange », erbicidiu chì dà u càncaru, ch’hà pruvucatu dinù malfurmazioni cungenitale nant’à i zitelli vietnamiani, cambudgiani o laossiani, paesi chì sò stati pulverisati da l’aviò americani durante a Guerra di u Vietnam. Monsanto torna, hà prudutu l’ormona di criscenza è u famosu gliffusate chì cumpone l’erbicidiu Roundup, suspettatu d’ùn sò quantu vìttime à traversu u mondu…
Avete capitu, ci hè di chè à dassi penseru, à sente i dui chì s’anu da marità. Bayer si compra Monsanto è sta fusione arrangia bè u gigante americanu chì hè perseguitatu per l’affare di u gliffusate, pè u più in Argentina. Ssu mostru industriale s’impadrunìsce di u sistema alimentariu internaziunale, per vìa di e sumente. U lobbying hè digià forte, st’unione serà tremenda ! Tremindui sò già cunnisciuti per avè cumpratu scientìfichi, circatori, omi pulìtichi, ghjurnalisti… Inseme, quale serà capace di resiste à a so putenza maligna ? À chì ghjove di dassi trattati, lege è direttive nant’à a biodiversità in Auropa, à chì ghjove prutezzione di a salute di l’omi è di a natura, sè in u frà tempu, omu si lascia cumprà da ssi dimonii chì si strùghjenu a pianetta ? U perìculu ci hè per l’ambiente è pè a salute di l’omi è di l’animali, ma ci hè dinù pè a demucrazìa. I pìcculi pruduttori ùn anu più mezu di resìsteli, impediti ch’elli sò di fabricà e so pròpie sumente. Pocu à pocu Bayer-Monsanto s’hà da impònesi à u mondu sanu. Un veru spaventu.
Fabiana Giovannini.