A cicculata piace à tuttu u mondu, hè un ingurdizia famosa chì dà nàscita à mondu mare è maraviglia di sapori è gusti da tutte e mamme, biancu, neru o à latte, si ne face ancu culuriti, rossu, turchinu, verde, giallu, eccèttera à chì ne vole, cù nentru frutta, licori, cunfittura, butiru, crema, rètula… da Pasqua à Natale è tutte e feste o anniversarii, hè un bellìssimu rigalu ch’ùn scorta mai à nimu ! Ma qual’hè chì pensa à cumu hè fabricata sta cicculata ? Si sà, ch’ella si ne colla à a civilisazione Maià chì cultivava e fave di caccaò, ghjunte sin’à noi ind’è l’annate 1500, purtate da i primi navigatori ch’andàvanu à corre u mondu è ch’avìanu scupertu ssu fruttu misteriosu è a so pòlvera da beie mischiata cù acqua o latte… I paesi aurupei, aghjustendu zùccheru, n’anu fattu un deliziu è pò più tardi artisti più chè artisgiani l’anu travagliatu da fanne mondu cicculate gustose. Oghjeghjornu hè fruttu d’un business mundiale è u cumerciu di u caccaò hè ancu vergugnosu, di stintu culuniale, sfruttendu e pupuluzioni di i paesi pòveri induv’ellu hè cultivatu. « Anderete sin’à induve per un dulciume à a cicculata ? »… dumanda una petizione di SumOfUs. U scopu hè di mette a pressione nant’à e grande multinaziunale di u caccaò Nestlé è Pladis. « Cù u gigante francese di u zùccheru è di u caccaò SucDen, i fabricanti di e barre KitKat, di e cicculate Godiva è di i dolci BN ùn sustènenu micca un iniziativa chì permetterìa à millioni di paisani di sorte d’una puvertà strema » dice ssa petizione. I caccaocultori di u mondu travàglianu per pochi soldi à pruduce a fava di caccaò chì ci permette di fabricà a cicculata. « Ci tocca à agisce per dinunzià è copre di vergogna l’intraprese ch’ùn pènsanu chè à u so prufittu, impippèndusi di sapè chì quelli chì travàglianu per elli ùn càmpanu micca di manera degna cù e so famiglie. » « Dite à Nestlé, Pladis è SucDen di sustene un prezzu degnu pè i pruduttori di caccaò d’Àfrica di l’Ueste è di u mondu sanu ! » dice torna ssa petizione. Bisogna à sapè chè i guverni di u Ghana è di a Costa d’Avoria, chì raprisèntanu 65% di u cumerciu mundiale di u caccaò, anu decisu di travaglià inseme da fà cresce i prezzi. S’elli rièscenu, d’altri paesi africani seguiteranu u so esempiu è l’agricultori di u Ghana, a Costa d’Avoria, u Camerunu, u Nigerià, l’Indunasìa, l’Equatore è i paesi d’Amèrica Latina chì prudùcenu anch’elli u caccaò, puderanu campà megliu. L’indùstria di u Caccaò in i paesi ricchi raprisenta 100 milliardi di dòllari à l’annu, è i si spàrtenu SucDen, Nestlé è Pladis, dendu una limòsina à i paesi pruduttori ! SucDen s’hè ingagiatu à finanzà a difarenza di rivenutu pè i caccaocultori. Ci ferma à ottene l’ingagiamentu di Nestlé è Pladis. U PDG di Nestlé hà toccu quasi 10 millioni di dòllari in 2020, interrugatu da SumOfUs nant’à u travagliu di i zitelli, hè statu incapace di dì sè Nestlé fecìa o nò travaglià i zitelli… In fatti, più di dui millioni di cinini in u mondu stràzianu da a matina à a sera in e spluttazioni di caccaò. Fà chì u caccaò sìa pacatu à un prezzu degnu, permetterebbe di dà una vita degna à i parenti di ssi zitelli per mandali à a scola, invece di sfruttali. Sò già quasi 160.000 personi ad avè ziffratu a petizione. Sustenìtela ! •