Ùn simu ancu surtiti di a pandemìa. U Covid19 hà fattu più di 610.000 morti è cuntaminati 14,7 millioni personi in u mondu. È, à tempu ch’hè statu scrittu ss’articulettu, u bilanciu si serà torna ingattivitu per disgrazia… Solu a metà di ssi 14,7 millioni sò cunsiderati cum’è guariti. 196 paesi sò tocchi è si sparghje a cuntaminazione. Dapoi a surtita di u cunfinamentu di parechji paesi, u nùmaru di i morti hà duppiatu è 100.000 morti sò stati torna arregistrati solu in un mese. I Stati Uniti ch’anu rilativizatu l’epidemìa sò oghje u paese u più adduluritu cù 140.922 morti. Vene dopu u Brasiliu, cù 80.120 morti, u Reame Unitu 45.300 morti, u Messiccu 39.184 morti, l’Italia 35.045 morti…
L’Organisazione Mundiale di a Salute (OMS) chjama à a prudenza i dirigenti di a pianetta. Ci hè troppu casi di cuntaminazione torna è s’impenserisce pè u più di i Stati Uniti, u Brasiliu, l’ìndia, è l’Àfrica di u Sud. Dice l’OMS chì i casi cunnisciuti ùn sò chè una particella di i casi veri. Suvente, a ghjente hè cuntaminata senza sapela, è parechji paesi ùn tèstanu micca per cunnosce megliu u rìsicu di cuntaminazione. Peghju, in i paesi i più pòveri, ùn si sà nunda di i morti, i cuntaminati è u livellu di cuntaminazione ! Perch’è ùn anu micca mezu di trattà ssu rìsicu. L’Auropa s’inchieta di a situazione in Catalogna. Certe cità cum’è Barcelona vòltanu torna à cunfinà a ghjente, chjode i cummerci, è interdisce e vìsite in e case di ritirata. L’OMS si dice impenserita da a situazione in Àfrica, sinamente à avà u cuntinente era sparmiatu, ma cunnosce una forte cuntaminazione dapoi parechje settimane. Frà u più, u Sud. Dice l’OMS, « l’Àfrica di u Sud pò esse un precursore di ciò chì s’hà da passà in l’Àfrica sana ». Hongkong s’impaurisce dopu à avè annunziatu chì l’epidemìa era compia. A China prova à sorte di u cunfinamentu ma ùn hè ancu tutt’à fattu tranquilla. Los Angeles è i 10 millioni d’abitanti di u so circondu s’inchieta anch’ella cù una crèscita tremenda di u nùmaru di cuntaminati. « I ghjòvani adulti sò uspitalizati à un rìtimu ch’ùn s’hè mai vistu sinamente à avà » dice a so direttrice di a salute. Trump anch’ellu s’avvede ch’ùn hè micca statu abbastanza sèriu è mette un mascu ormai. A Culumbìa, a Bulivìa dòppianu i so casi di cuntaminazione tutte e settimane, è a cuntaminazione riparte in Argentina.
In Francia, 176.754 personi sò state cuntaminate, 30.177 sò morte è, oghje chì ghjè oghje, 6.589 sò sempre in rianimazione, 109 clusters (lochi di cuntaminazione forte) sò identificati è 5 dipartimenti sò particularmente in gattivu statu.
A Corsica ferma frà e regioni e più sicure, ma u penseru và à u passu è vene di i turisti è u mischiu di pupulazione ghjunte da pertuttu. Dapoi u primu di lugliu, 23 casi pusitivi sò stati identificati, è 11 personi fèrmanu uspitalizate.
Eccu. Fate attenti à voi è à i vostri. Mettite un mascu. Vi permette di prutege a ghjente è di fà ch’elli vi prutègenu anch’elli mettendu u soi. Lavàtevi e mani. Suvente.