Aldilà di a Francia, u mondu, è pè u più l’alleati, anu da cummemurà l’ottantèsimu anniversariu di u D-Day. 80 anni fà, u 6 di ghjugnu 1944, sbàrcanu più di 156.000 omi in Normandìa, mubilizendu millaie di battelli è imbarcazioni, 10.000 aviò, 200.000 veiculi, 5 divisioni d’infanterìa, 3 divisioni aeropurtate. 133.000 omi nant’à e spiagge, 13.000 paracadutisti è millaie d’aviatori chì bumbàrdanu e furtificazioni nemiche, scrìvenu a stòria è u primu ghjornu di a liberazione di a Francia, è cù ella quella di l’Auropa, da l’oppressione nazì. A surpresa hè tutale per l’Allemani chì s’aspettàvanu à un sbarcamentu à u Pas-de-Calais, è micca in Normandìa locu troppu luntanu di l’Inghilterra. L’operazione hè diffìciule chì l’Allemani anu stallatu più di 15.000 blockhaus è tràmpali à longu à e coste francese in u « muru di l’Atlànticu » da a Spagna à a Belgica, per impedisce ghjustu à puntu un sbarcamentu di l’alleati. Ind’è a nuttata, malgratu u gattivu tempu, u sbarcamentu hè decisu vistu a piossa chì stancia un pocu. A matina à bon’ora, centinaie di paracadutisti è i resistenti francesi appròntanu l’operazione, pigliendu è sicurizendu i lochi stratègichi, ponti è strade.
À i primi chjarori di u ghjornu, i battelli pùntanu à l’orizonte, Americani, Brittànichi, Canadiani è ben intesa, Francesi (3000), sbàrcanu nant’à a rena d’Omaha beach, Utah Beach, Gold Beach, Juno Beach è Sword Beach, cinque spiagge trà Cherbourg è Le Havre. Spiagge insanguinate da millaie di morti è feriti frà i quali numarosi ùn anu mancu avutu u tempu di cumbatte o di pone u pede in terra, stirpati senza avè pussutu entre in guerra, dopu à avè aspettatu ssu mumentu durante mesi è mesi d’approntu. 10.470 suldati alleati sò morti in Normandìa, è trà 4000 à 9000 morti allemani. Bayeux hè a prima cità liberata u 7 di ghjugnu, u 25 d’aostu, l’alleati èntrenu in Parigi pè a so liberazione, u 15 un antru sbarcamentu si face in Provenza, à tempu l’armata rùssia avanza à l’Este, l’Allemani rincùlanu sin’à Berlin.
U Reich capitula l’8 di maghju 1945.
Sta guerraccia principiata cù l’invasione di a Pologna da l’Allemagna nazì, u primu di sittembre 1939, hà mublizatu 100 millioni di cumbattenti è 61 nazioni. Hà fattu 62 millioni di morti, frà u più civili. Hà vistu crìmini contr’à l’Umanità, cù e depurtazioni, i campi di a morte è l’esterminazioni di pupulazioni intere, i ghjudei, ma dinù i tzigani, i slavi, i resistenti, i cumunisti, l’omosessuali, l’andicappati… Hà vistu dinù pè a prima volta l’usu di a bomba atòmica, l’Americani dumendu l’Imperu giappunese cù a destruzzione di Hiroshima, u 6 d’aostu, po di Nagasaki u 9 d’aostu. E bombe atòmiche anu fattu quasi 300.000 morti u ghjornu stessu. Senza cuntà e decine di millaie di ghjente è ancu di più, morti i ghjorni, i mesi è l’annate dopu…
Disgraziosamente, e cunsequenze di a guerra, u cuntestu chì li hà datu nàscita, l’anàlisi di e so ragioni, ùn bàstanu à u mondu per tirà ne tutte e lezzioni è fà ch’ella ùn accade mai più un cunflittu mundiale. Eppuru, 80 anni dopu, u mondu hè torna sott’à a minaccia d’una terza guerra mundiale chì sarebbe sta volta nuclearia. U Kremlin minaccia di più in più di fronte à a mubilisazione di l’Otan per sustene l’Ucràinia. È u mondu pare appruntassi à un cunflittu generalizatu. •