Mundiale di futbol à u Qatar

Disgustu

Chì mondu assurdu hè bruttu… Campemu una èpica minacciosa cù i messagi di perìculu imminente è e chjame à a subrietà ripetute à chì ne vole per via di u riscaldimentu climàticu è di l’impuverimentu di e risorze di a pianetta. In issu cumbugliu angusciosu induve u citatinu hè culpabilizatu è chjamatu à fà sempre di più sforzi per ùn frazà l’energìa per scaldassi o per viaghjà, ci hè un evenimentu chì s’appronta induve à scimizia di l’omi franca tutte e lìmite. A pròssima cuppa di u mondu di u ghjocu à pallò hè una sfida à u sèmplice sumerinu. Sìmbulu di tutte e gabegìe è immuralità, nìchjula di curruzzione, di disprezzu è d’inumanità. Una cuppa di u mondu di ghjocu à pallò hè l’evenimentu spurtivu u più aspettatu è fighjatu di a pianetta. Accade tutti i quattru anni è mubilizèghja decine di millioni d’appassiunati. A cumpetizione è u rimuschju mediàticu hè cusì grande ch’alletta tutti i speculatori è scumettidori di u mondu. S’ellu ci hè un evenimentu chì dà retta à l’adasgiu « u soldu rè », hè questu quì. U Qatar, induv’ellu si passerà quist’annu, ùn hè nè una nazione di pallò, nè un locu chì pudìa accoglie un tal’evenimentu, per vìa di u calore ch’ùn permette micca di ghjucà à u futbol, per vìa di u so alluntanamentu per centunaie di millaie di personi chì s’appròntanu à fà u viaghju, per vìa ch’ellu ùn esistìa nisun infrastrutture per accoglie i scontri internaziunali di ghjocu à pallò, per via di a chjuculezza di u paese induve i stadii quasi quasi s’anu da tuccà, allora chì l’interessu sin’à avà di un tal’evenimentu hè di porghje richezza dinù à u paese accugliente, sparghjendu e squadre è i so staf in parechje cità, fendu scopre tutte e so regioni è mudernizendu in u stessu tempu pè a ghjente chì ci càmpanu l’infrastrutture spurtive di u paese. Hè l’interessu spartutu d’un tale evenimentu chì u Qatar ùn hà micca. Eppuru, hè statu sceltu, è l’ingutuppe ch’ellu hà sbursatu ùn si cunnosceranu mai… U soldu sguassa tutte l’assurdità ! Ci hè vulsutu custruisce sei stadii novi novi è mette à livellu i dui ch’esistìanu in un spaziu di solu 50 chilòmetri quadrati… stadii ch’ùn ghjoveranu più à nimu passatu u tempu di sta cumpetizione. Ci hè vulsutu ripurtà a cumpetizione à u mese di dicembre (s’hè sempre ghjucata di ghjugnu) da ch’ellu fessi menu caldu. Ci hè dunque vulsutu disturbà tutti i campiunati naziunali di tutti i paesi… È què ùn hè nunda di pettu à u costu umanu di ssu scàndalu tamantu. Ci hè vulsutu à fà travaglià decine di millaie d’operai in cundizioni climàtiche tremende in pienu disertu per custruisce ssi stadii. Parechje millaie sò morti nant’à i cantieri (in 2021 si parlava di più di 6500 morti !). Indiani, pachistanesi, nepallesi pè a maiò parte, pacati una limòsina, trattati cum’è schiavi da ch’ellli travaglièssinu in furia. Ci hè vulsutu climatizà ssi stadii per chì i ghjucatori pòssinu suppurtà u calore… è ancu, si piglierà u rìsicu pè a so salute, fènduli ghjucà in pienu suleoni… Senza parlà di a dittattura di u reame pè e donne o l’omossessuali, minacciendu di priggiò u mìnimu mancamentu à e legge di a charia…

I soldi fàcenu perde u cerbellu. Chì stumacheghju ! •

Fabiana Giovannini.