L’8 di marzu, ghjurnata internaziunale di i diritti di e donne hè stata stituziunalizata da l’Urganisazione di e Nazioni Unite in u 1977 in sèguita à e lotte di l’operaie per migliurà e so cundizioni di vita, è da ch’elle pòssinu vutà e donne in certi paesi. Dapoi, ssa data hè ghjornu di manifestazioni in u mondu sanu, casu d’interrugassi nant’à e so gattive cundizioni, e torture è l’inghjulie chì e mènanu, di fà sapè è di festighjà dinù i prugressi chì ci sò stati in certi lochi, ma pè u più di dinunzià l’arcaìsimi ch’esìstenu sempre in certi paesi. 40 anni dopu per disgrazia, è francatu u secondu millenariu, a cundizione di a donna ùn hè ancu para à quella di l’omu. A « ghjurnata di i diritti di a donna » ferma per un pezzu un bisognu !
Disgraziosamente dapoi qualchi annu ci hè una spezia di ricuperazione di sta ghjurnata vultata in « ghjurnata di a donna » cù aspetti cumerciali, publicità, prumuzioni, vèndite da tutte e mamme, chì pìglianu pocu à pocu u passu nant’à a sensibilisazione à u bisognu di difende i so diritti in u mondu. Ssa ghjurnata diventa un mumentu di buisness chì affoca u messagiu primu è – peghju – chì face torna di a donna una «mercanzìa » è dunque un uggettu di disprezzu. U penseru oghje hè ch’ellu fermi l’8 di marzu « ghjurnata internaziunale di i diritti di a donna ». U primu di ssi diritti hè quellu di ùn esse viulentata. Oghjeghjornu mòrenu sempre donne sott’à i colpi di u so maritu, u so cumpagnu, u so babbu o u so fratellu… In Auropa una donna nant’à trè hè stata vìttima di viulenze fìshiche o sessuale. L’Agenzia aurupea di i diritti fundimentali dicìa in u 2014 chì 62 millioni di donne in Auropa avìanu già suffertu di ste viulenze, una donna nant’à 20 hè stata viulentata. E donne dèvenu esse trattate à paru à l’omi pè u travagliu è e rispunsabilità. Ma ci hè vulsutu una lege da ch’elle sìanu cumposte à paru d’omi è di donne e stituzioni in Francia. Ind’è l’amministrazione o l’imprese, a piazza di a donna torna deve esse à parità. Ma ne simu bell’alluntanati. E paghe di e donne sò in generale inferiore di 20% è più à quelle di l’omi. Ùn ci sò chè 20% d’omi à partecipà à l’òpere casaline è sò torna solu 20% e donne à esse elette parlementarie. U peghju hè u sessìsimu è u travagliu pò ci hè da fà rinculà l’edee arcàiche chì e donne sò dette più dèbule, menu intelligente, menu capace.
Dipartuttu e donne anu diritti inferiori à quelli di l’omi è in certi paesi ancu, si ponu insultà, sottumette, marturià, è ancu tumbà, senza à avè à rende contu di ssi crìmini di pettu à a sucietà. In ssi paesi custì a donna hè un strumentu di travagliu, o di piacè per l’omu, o una riprudutrice è basta. Da chjuca chjuca, ùn hà nisun dirittu chè di subisce senza dì mottu per vìa di a religione, e cridenze, a cultura. In cert’altri paesi, esìstenu i diritti pè a donna ma ùn sò micca rispettati è hè mal’vistu pè a donna di lagnassi. Da vede in i paesi detti « sviluppati » cum’è a Francia, certe cundizioni di vita, omu si pò dumandà cumu pò avanzà a càusa di a donna in i paesi sottusviluppati… Sarà torna longa a strada di a so liberazione.
Fabiana Giovannini.