Una donna nant’à trè hè vìttima di viulenza in u mondu… vale à dì quasi un quartu di l’Umanità !
E viulenze nant’à e donne sò tremende. Fìsiche, sessuale, psicològiche, sò martorii insuppurtèvuli.
Secondu l’inchieste tutti i livelli ecunòmichi o suciali sò cuncernati. Certe viulenze sò arradicate in e culture di i so paesi, è l’evuluzioni sucetale sò loscie.
Donne viulentate subìscenu doppia pena, quella d’esse stata viulentata, è quella d’esse cunsiderata cum’è rispunsèvule di ciò chì l’accade, ghjittata in priggiò, flagellata, o tomba à petrate in certi paesi. E donne – cù i zitelli dinù, sò e prime vìttime di i cunflitti, e guerre, e catastrofe naturale, a misèria, u sottusviluppu, e viulazioni di i diritti umani.
I paesi detti sviluppati ùn sò micca megliu è si vede chì a donna suvente hè poca cunsiderata torna. Una donna more in Francia tutti i trè ghjorni marturiata da u so maritu o u so cumpagnu, o anzianu cumpagnu.
U bisognu d’un Grenelle di e viulenze fatte trà coppii (pè u più viulenze fatte à e donne), mostra quant’ellu hè un fiascu sinamente à avà a pulìtica di lotta contr’à sse viulenze. È à tempu ch’ellu si tene ssu Grenelle, duie altre donne sò morte sott’à i colpi di un omu. Hè dì quant’ella hè stallata ssa calamità in a sucetà è quant’ella impuzzichisce e cuscenze. Ci tocca à cambià e mentalità, a manera stessa di vede a donna, i so dritti, u rispettu ch’omu li deve. In Corsica, sò ottu e donne morte in 10 anni da e viulenze d’un omu. Una hè digià troppu, un offesa à a vita, ma dinù à i nostri valori umani è culturali. Hè insuppurtèvule.
Ssu 22 di sittembre in Erbalonga à l’iniziativa di « Femmes Solidaires de Corse » una ghjurnata di scambiu hè stata urganizata, «Donne arritte ! A viulenza mai più ». Pè a sola annata 2019 ch’ùn hè ancu compia, dice Femmes Solidaires, « 223.000 lagnanze sò state sposte in Francia, 109 donne sò morte. Omu sà ch’elle sò dinù menu di 10% à porghje lagnanza in ghjustizia… » Vale à dì quant’ellu hè maiò u prublema ! Cumu luttà contr’à ssa strage ? Era u scopu di a riflessione di ssu 22 di sittembre. Dalli a parulla, mette in ballu mezi di prevenzione, rispunsabilizassi à tutti i livelli. Vìttime, parenti di vìttime, sociologhi, psicologhi, Statu, Cullettività di Corsica, servizii suciali, mondu assuciativu… èranu presenti. «Quandu hè morta a mo figliola, di marzu scorsu, hà dettu u babbu di Julie Douib, assassinata in Balagna dopu à avè depusitatu ùn sò quantu lagnanze, ci èranu 30 donne morte in Francia, oghje ci n’hè 109. Ci hè qualcosa ch’ùn và micca. Ci hè un blucchime in qualchi locu di sicuru. Ùn a sò induve, ma ci hè un mancu d’attenzione per sse donne. Omu deve stali à sente, omu deve prutègeli ».
Ssu testimognu dice tuttu.
Fabiana Giovannini.