Dui mesi dapoi ssu 2 di marzu maladettu di l’agressione murtale contr’à Yvan Colonna in a priggiò d’Arles. Un mese ch’ellu hà lasciatu sta terra senza rivede a soia. Quasi un mese dinù ch’elle si sò piantate e viulenze in carrughju di una ghjuventù in brama di ghjustizia è di verità. Eppuru, dapoi un mese dinù è u 4 d’aprile, lindumane di l’ùltima manifestazione, u guvernu hà chjosu di manera unilaterale e discussioni ch’ùn anu mancu avutu u tempu di nasce… Chì ne serà oghje di e prumesse di Macron è di u so ministru Darmanin ? Chì ne serà di e neguziazioni ? È di l’autunumìa si ne puderà parlà ? Ci volerà à aspettà torna a creazione d’une novu guvernu ? Cosa capiscerà di a Corsica è di i so più di 58 % di votu pè a strema dritta ? È noi, chì ci pudemu capisce à ssu pòpulu chì porta trè volta u naziunalìsimu corsu à e rispunsabilità è chì vota pè a candidatura a più upposta è odiosa à e so rivendicazioni à e presidenziale ? 45 % d’astenzione è di votu biancu o annullati nant’à i scritti… I bianchi è nulli fàcenu 5,78 % di i scritti, è 9,51 % di i sprimati ! Èranu 2,07 % di i scritti à u primu giru, è 3,3 % di i sprimati. Sò torna 10 punti di menu pè u presidente di a Repùblica in Corsica per raportu à l’elezzione presidenziale di u 2017. S’omu conta tutti quelli ch’ùn anu micca vulsutu vutà à Macron malgratu e chjame à fà tràmpalu à a strema dritta, sò 77 % in Corsica !… Chì cunclusioni ne ferà u presidente di a Repùblica ? È noi, chì ne pensemu ? Pudemu cuntentàccine ? Sè Macron ci hà fattu prumesse, n’avemu fattu dinù à Yvan, chjosu in una cèllula, pò à Yvan, chjosu in una cascia. Avemu sfilatu daretu à e parulle « Ghjustizia è verità », decine di millaie di manifestanti in Corti, in Bastia, in Aiacciu. È torna centinaie à addunìscesi di fronte à e prefetture à mezu à l’azzuffi… decine di feriti, certi cù forse cunsequenze nant’à a so salute ch’anu da durà mesi è ancu di più. È uni pochi torna sò o seranu à risponde di pettu à un tribunale… A zerga, l’emuzione, e brame di ghjustizia l’avemu sempre in gola. Ma omu si sprufonda ind’è l’imputenza. Chì ne serà di a Corsica per ssu quinquennatu ? Chì ne serà di i raporti Corsica Francia ? A nostra ìsula hè sempre ind’è l’incertezze è u fossu culturale chì si scava torna un pocu di più. Ùn saremu micca a priurità di Macron. Eppuru, li ci volerà inventà qualcosa chì stàssine à stu fossu costerà caru à tutti.
Nunda di spùticu è sanu ùn puderà nasce è custruìscesi nant’à e bugìe è e manipulazioni ch’anu cunduttu à a cundannazione, pò à l’assassìniu d’Yvan Colonna. Un avvene appaciatu è di custruzzione hà bisognu di ghjustizia è di verità. •