U novu drama accadutu in core di Parigi, induve un omu identificatu cum’un perìculu islamistu esciutu di prigiò pocu fà, hà tombu un turistu allemanu è feritu duie altre persone… interpella da a so atrocità. Ma dinù da a manera ch’ellu tratta a lotta contr’à u terrurìsimu u guvernu francese. I mèdia francesi s’impenserìscenu di sti terruristi islamisti chì èscenu di prigiò è sò cappiati ind’è a natura. Cartulatu S, cunnisciutu da u so islamìsimu dettu « radicale », toccu da disturbi psichiatrichi, l’omu di 26 anni era statu cundannatu in u 2016 per avè vulsutu appruntà un attentatu. Esciutu di prigiò in 2020, era « seguitatu » da a DGSI nant’à internet è sottu cuntrollu ghjudiziariu. Hà tombu u corciu turistu mughjendu Allah Akbar è hà rivendicatu l’assassiniu di fronte à a pulizza chì l’hà interrugatu. Francese d’urìgine iraniana, hà dettu ch’ellu vulìa vendicassi di l’assassinii di i musulmani in u mondu. Avìa cumunicatu cù parechji altri terruristi, frà i quali Abdoullakh Anzorov ch’hà tumbatu, scapèndulu, Samuel Paty… Era statu messu in guardia custòdia à l’èpica di l’assassiniu di u prufessore, ma a ghjustizia averìa ricusatu à a pulizza u drittu d’andà à visità u s’alloghju… Puru, avìa cumunicatu dinù cù Abel Kermiche, ch’hà tumbatu u prete di Saint-Etienne-du-Rouvrai in 2016… è cù Larossi Abballa, l’assassiniu di dui pulizzeri in Magnanville, dinù in 2016. Duvìa seguità un trattamentu pè u so disturbu psichiatricu, ma avìa piantatu e medicine dapoi u 2022 è a pulizza a sapìa… Hà spiecatu ch’ella ùn pudìa micca arrestalu senza ch’ellu appii cummessu un delittu… Umbeh ! Era statu torna esaminatu da un duttore ma, secondu à ellu, ùn avìa più nunda di periculosu ! Si pò pensà tandu chì a surveglianza hè stata sminuita. Cume sè i terruristi ùn pudìanu micca esse storti è maligni da sbaglià omu ! Eppuru !… a so mamma avìa fattu sapè a so inchitùtine di vede u so figliolu scambià è rinchjùdesi st’ùltimi mesi…
Yvan Colonna dorme in Campu Santu dapoi u 21 di marzu 2022. È u so assassinu chì diventa ? Malgratu u so parcorsu di terruristu periculosu ch’avìa scumbattutu in Afghanistan, malgratu l’agressioni contr’à guardiani o contr’à altri prigiuneri, malgratu a so viulenza cuntìnua, malgratu i so disturbi psichiatrichi, malgratu u fattu ch’ellu era detenutu particularmente signalatu (DPS), malgratu e dumande multiplicate di i so guardiani da ch’ellu sìa mandatu in un quartieru d’evaluazione di a radicalisazione, è dunque cacciatu di a prigiò induv’ellu era detenutu Yvan. Malgratu e so minaccie d’assassinà à Yvan à a vigilia di l’assaltu murtale, malgratu u fattu ch’ellu duvìa esse survegliatu da vicinu,… hà ottenutu un travagliu cù u drittu di circulà cum’ellu a vulìa in prigiò, s’hè ritruvatu solu solu (fattu interdettu in u regulamentu di a prigiò) cù Yvan in una sala di sport, induv’ellu hà pussutu assaltalu cù surpresa senza chì nimu interveni. Malgratu e camerà di televisìo ind’è a sala è i mughji d’Yvan, l’hà tichjatu di colpi è affucatu durante 9 longhe minuti, po si n’hè andatu tranquillamentu à aspettà in a so cèllula i pulizzeri, cum’è s’ellu sapìa ch’ellu ùn risicava nunda…
Iè… chì diventa Elong Abé ? Chì divèntanu tutti quelli ch’anu « sfunziunnatu » è si sò cusì resi cùmplici di l’assassinu quellu maladettu ghjornu di l’assaltu u 2 di marzu 2022, da e facilità chì li anu datu per agisce, è da i tràmpali ch’anu messu à Yvan da impedìscelu di sorte di quella sorte funesta ?
Ghjustizia è Verità ! •