«Covid19 : le lourd tribut payé par les élus ». Ssu tìtulu nant’à France Culture hè tremendu è dice tuttu. Parechji merri, cunsiglieri municipali è amministrativi sò morti dopu à esse stati cuntaminati durante à a campagna eletturale o u scrutinu di u primu giru di l’elezzioni municipale. « Cunsiglii municipali stirparti » si lamenta u media francese. U 12 di marzu 2020, malgratu l’infurmazioni inchietenti chì palèsanu l’annunziu eminente d’un cunfinamentu in Francia, u Presidente di a Repùblica annunzia u mantenimentu di l’elezzioni, è dumanda – à tempu – à i Francesi d’esse prudenti è d’ùn spiazzassi… « Facciu cunfidenza à i merri è à u civìsimu d’ugnunu » dice Emmanuel Macron, « si sà chì e cumune è i servizii di u Statu anu urganizatu bè e cose. »
« Eppuru, dice torna France Culture, parechji eletti sò stati cuntaminati durante a campagna è u scrutinu. Numarose sò e regioni induve i gesti barriera ùn sò micca stati rispettati. » È di mustrà una videò cù mani senza guanti chì si tòccanu, merri chì tòssanu à mezu à l’altri, ghjente chì si tènenu strinte strinte, aggruppamenti, accolte, mani nant’à e spalle, abbracciate, cuntatti da tutte e mamme !!!
« Parechji merri sò morti è u guvernu hè statu ublicatu di piglià un urdunnanza da permette à e cumune di funziunnà » è rege a situazione, dice France Culture, « 15 ghjorni dopu à a so rielezzione triunfale u merre di Saint-Brice-Courcelles (Marne), figura lucale, more di u coronavirus. » « Puru sè n’avemu messu in ballu e cunsigne di u guvernu per l’isulatorii è e distanze, ùn èramu micca prutetti… avemu urganizatu l’elezzione à visu scupertu. Per quelli chì tenìanu i scagni, era cum’è in 14, nant’à u Chemin des Dames, èramu in prima lìnea ! » spieca u so primu aghjuntu. Hè statu malatu anch’ellu cù una decina di personi di u Cunsigliu Municipale nant’à 19. Tutti quelli ch’avìanu partecipatu à u scrutinu…
À Tracy-le-Mont (Oise) un aghjuntu hè mortu, cuntaminatu durante a campagna, una settimana nanzu à u scrutinu. « Durante u spogliu, ùn ci hè statu mezu di rispettà u distanziamentu », spieca u merre… Dui èranu malati è suddàvanu, spieca torna u merre. Qualchi ghjornu dopu, parechji membri di u Cunsigliu municipale sò cascati malati.
L’affare si ripeta in parechje cumune, sò morti qualchi ghjorni dopu à u scrutinu i merri di Beurey-Bauguay (Côte d’Or), di Saint-Louis (Haut-Rhin), è in parechji altri lochi (Belfort, Coudekerque-Branche, Hanzi-Saint-Aubin, Caluire-et-Cuire, Compiegne, Crepy-en-Valoy, ecc.) parechji sò l’eletti à esse cascati malati… « Diffìciule di fà u contu » dice France Culture. In quant’à u Cunsigliu scientìficu di u presidente di a Repùblica, mette a colpa à quelli cascati malati… secondu à France Culture : « l’omi pulìtichi s’ingàgianu à rege una cumuna. Occùpanu funzioni impurtante. Dèvenu mette in ballu è fà rispettà e misure ch’ellu ci vole. Sè ùn l’anu micca fatta ci hè da fassi penseru »…
Fabiana Giovannini.