Erpali di Nurmandìa chì si sfòndanu, grande stese di rena chì si pèrdenu parechji metri per vìa di e timpeste è di e grande maree nant’à u liturale atlànticu, mare chì si runzeca e nostre sponde in Corsica, case private è residenze di turìsimu ch’ellu ci vole à spiazzà… u liturale rincula dapertuttu… è ciò chì si fecìa qualchi annu fà, ghjuchèndusi di e lege d’urbanìsimu chì circàvanu puru à anticipà nant’à stu fenòmenu, ùn si pò più fà. Avìanu a raggiò l’associ di difesa di l’ambiente, è pudete circà quant’è vo vulete à mette prutezzioni da tutte e mamme è cuscini di rena à più pudè per pruvà di mantene à pocu pressu u liturale à u so livellu, stu rinculu hà da cuntinuà.
U livellu di u mare colla, e sponde s’eròdenu, porti o custruzzioni i pedi nè l’acqua pruvuchèghjanu a trasfurmazione è u rinculu di a lìnea di e coste. Di marzu scorsu, l’Ispezzione generale di l’amministrazione (IGA) è l’ispezzione generale di l’ambiente è di u sviluppu (IGEDD) anu resu un raportu cunsacratu à l’addattazione di i territorii di pettu à l’erusione liturale è e spese ch’ellu ci hà da vulè prevede per parala. U fenòmenu hè cunnisciutu, è nurmalamente lente, ma cù u riscaldimentu climàticu (quì dinù !) è i ciambuttamenti ch’ellu pruvucheghja, l’erusione cresce in fùria. U raportu hà cuntabilizatu 1046 lucali industriali è cumerciali cuncernati da quì à cinque anni, cù un costu di 238 millioni d’àuri, 8200 lucali da quì à u 2050 (5200 alloghji è 3000 lucali d’attività) d’un valore di 1,2 milliarda d’àuri ! 450.000 alloghji è 55.000 lucali d’attività da quì à u 2100 d’un valore di 94 milliardi d’àuri ! Dice torna u raportu chì e cumune e più tocche ùn sò identificate cum’è priuritarie per rializà carte lucale d’erusione, è e strategìe lucale di gestione integrate di a lìnea di costa (SLGITC) sò quasi inesistente… Ghjè dì quantu ùn simu pronti à attaccacci à e cunsequenze di ssu disastru ecunòmicu è ambientale. Vistu ch’ellu hè un rìsicu chì si deve prevede, ùn hè micca presu in contu da l’assicuranze in casu di catastrofe naturale. Allora quand’ellu accade una timpesta chì si strughje a casa o quasi, i prupietàrii si vòltanu contr’à u Statu per dumandà aiutu. Ùn ferma chè dispusizione di sulidarità pè e residenze principale per strappà una cumpensazione. In quantu à e residenze secundàrie o di turìsimu, peghju per elli ! U raportu prupone una dutazione finanziaria di u Statu per cumprà e prupietà, secondu à e risorze di a vìttima è u so livellu di cunniscenza di u rìsicu quand’ellu hà cumpratu l’alloghju. Sarebbe cù un màssimu di 70 % di u valore di a casa ind’a lìmita di 300.000 àuri… Finitu u tempu chì Marta filava ! Per vìa di tuttu stu spusessu da fà, u raportu dice ch’ellu ci hà da vulè prevede omancu 250 millioni d’àuri pè i pròssimi 25 anni. E cullettività territuriale sò invitate à utilizà u fondu verde è à ghjucà nant’à a fiscalità. Vistu u travagliu chì l’aspetta è ciò ch’ellu hà da custà, ci hè di chè à fassi penseru nant’à e pussibilità di u guvernu di riparà ciò ch’ellu s’hè fattu l’ùltimi sessant’anni in Francia lachendu custruisce n’importa cumu n’importa induve. Dice a furmìcula, avete cantatu ? Ballate puru avà ! •