A sapete, o cari lettori, sò nate e nostre prime scole d’insignamentu immersivu in lingua corsa ! In grazia à l’aiuti multiplicati di militenti è simpatizenti, ma dinù di e cumune di Biguglia è Bastia chì crèdenu in noi, è di a Cullettività di Corsica sempre pronta à sustene a nostra lingua, anu apertu e scole di biguglia (à u senu di u gruppu sculare Simone Peretti) è di Bastia (à u senu di a Scola Charpak) ! Ringraziemu tanta è tanta ghjente, frà i quali associi è militenti di Praticalingua, Parlemu Corsu, l’AILCC (associu di l’insignanti di lingua è cultura corsa), u STC Educazioni, l’Associu di i Parenti Corsi, u Spaziu Culturale di Biguglia, u retale Eskolim ch’adunisce tutte e scole d’insignamentu immersivu in lingua regiunale, cum’è Diwan in Brittagna, Seaska in Paese Bascu, Calendreta in Occitania, Bressola in Catalogna, ABCM in Alsazia !
Un mese dopu à a nostra prima rientrata, hè sempre una maraviglia di vede ssi 25 ciucci truvà tutte e matine e so maestre. Certi fòrmanu digià e so prime frasuccie cù babbu è mamma, è sè vo v’affaccate in scola per scuntrà e maestre, vi cunteranu quant’elle sò fiere anch’elle di st’avventura maravigliosa. Puru, ùn màncanu i capatoghji. Tutti i ghjorni, ci sò bisogni da regulà. S’appòghjanu e maestre nant’à l’associi di e scole, Scola Corsa di Biguglia è Scola Corsa di Bastia, i so presidenti, Alinu Gherardi è Pasquale Castellani, i so scagni, è sopratuttu i parenti chì sò impegnati assai. Tutte e settimane o quasi, un puntu di l’avvanzate, è i bisogni sò fatti è tutt’ugnunu si dà di rimenu per regulà i prublemi. I Parenti, babbi, mamme è ancu caccari è caccare, zie è zii, cummare è cumpari, anu appruntatu cù noi a prima serata Scola Corsa, chè no urganizemu stu vènari in Biguglia à u Spaziu Culturale. Biscotti da tutte e mamme, banchi culuriti è urnati di fottò è disegni, e maestre è i so elevi vi invìtenu à scopre i primi travaglii fatti in scola ! I parenti anu da vende i so biscotti per fà entre qualchi soldu. Ci serà dinù in grazia à Michele Angeli è e so squadre un bancu per beie è manghjassi qualchi buccunetti aspettendu a bellìssima serata appruntata da Felì, l’Attrachju è Missaghju. Puppeppu ci ferà forse una surpresa pè i cinnini. Forse hè troppu à bon’ora per sente cantà i nostri zitelli, quelli di Scola Corsa, di Scola in Festa o di l’attelli di u Spaziu Culturale, ma vidaremu sè n’avemu una surpresa… Ci sarà ben intesa dinù u bancu di Scola Corsa chì puderete pòrghjeci u vostru sustegnu, cumprà e nostre belle magliette, appiccicatoghji, o biglietti di tombolà ! Scola Corsa piglia dinù l’adesioni, per 10 € à l’annu è i doni sò più chè benvenuti ! Faremu un accolta particulare dinù à l’imprese corse chì sò un sustegnu preziosu aspettendu chè no pòssimu benefizià di a cuntrattualisazione cù l’Educazione Naziunale. Ci impone un pèriodu prubatoriu di 1 à 5 anni. Sperendu ch’ellu serà unu piuttostu chè cinque, simu pronti à rilevà scumessa cù l’aiutu di u pòpulu corsu impenseritu di l’avvene di a so lingua. Allora, cari amichi lettori, affaccàtevi vènari u 22 d’ottobre in Biguglia à porghje u vostru sustegnu à a prima filiera assuciativa d’insignamentu immersivu in lingua corsa ! Aiutèmuci tutti inseme ! Evviva Scola Corsa !!! •