U 29 di lugliu scorsu, hè stata lampata a chjama à l’adunita da « custruisce un paese ». Gilles Simeoni brama di fà di Femu a Corsica un « partitu di guvernu » da strutturà a lotta è dà di pettu à l’inghjochi chì ci aspèttanu. I militeni anu aderitu di manera massiccia à ssa chjama. Quasi una millaia hè già scritta à e quattru cummissioni chì sò state create. Saranu da quì à pocu adunite per riflette à i fundimenti, i statuti è u funziunamentu di u novu partitu. Arritti hà cunsacratu u so nùmaru speciale di u mese d’Aostu à quell’evenimentu di u 29 di lugliu è u mèttodu chì ci hà da purtà sin’à u cungressu custitutivu. A creazione di ssu partitu serà un saltu qualitativu dopu à 10 anni di travagliu in cumunu trà e cumpunente di Femu a Corsica. U scopu hè di cresce è d’urganizassi di manera sempre più demucràtica è efficace. Ssu passu in davanti dumanda sacrifizii. Quellu di girà una pàgina di vita di e nostre lotte. E trè cumpunente attuale di Femu a Corsica anu e so abitùtine di vita, d’indiature è di travagliu. Sò chjamate à cambianne, à riparte da zeru per ricustruì e cose inseme, aprèndusi è allerghèndusi à d’altri. Hè una spècia d’aghjurnamentu ch’ellu ci tocca à fà. Adunìscesi à u senu d’un solu partitu, da risponde megliu à e scumesse è l’inghjochi. « Custruimu Femu a Corsica, custruimu a nazione » hà dettu Gilles Simeoni. «Ciò ch’hè davanti à noi, hè di custruisce un paese. Custruisce un paese, ùn hè vince à l’elezzioni. Vince à l’elezzioni, hè un mezu di principià ad avè l’arnesi per custruisce un paese. Ma per custruisce un paese, sopratuttu un paese ch’hè statu trattatu di manera culuniale da u Statu, un paese chì dubiteghja, in u cuntestu francese, aurupeu è internaziunale in crisa, ci vole bellu di più chè un presidente di u Cunsigliu Esecutivu o un presidente d’Assemblea di Corsica. Ci vole bellu di più chè deputati o municipalità. Ci vole à esse capace d’avè donne è omi chì travàglianu nant’à tutti i duminii, ci vole à dassi i mezi di què. È per fà què, è per falla bè, ci hè un arnese. Ùn hè a sola cundizione, ma hè indispensèvule : ghjè Femu a Corsica ».
«Oghje più chè mai, hà dettu torna Gilles Simeoni, avemu u bisognu d’una struttura, d’un partitu di guvernu chì nutrisce a riflessione, chì và à circà in altrò ciò chì si face di bè è chì funzionna, in Sardegna, in Auropa, in u mondu ».
« Sàpiate chì tutte e decisioni ch’avemu da piglià, ci ingàgianu, à Femu a Corsica o à i nostri partenarii, dèvenu esse riflettute cù un orizonte è un quadru stratègicu di deci anni. Quattru annu pè a pròssima mandatura. Sei anni per quella chì seguita. 10 anni per custruisce un paese. Eccu perchè avemu u bisognu di st’arnese, Femu a Corsica ».
Femu a Corsica per fà a Corsica.
Fabiana Giovannini.