Di ghjennaghju scorsu, u ministru di a Ghjustizia Eric Dupond-Moretti parlava di 94 feminicidi in 2023, contru à 118 in 2022, felicitèndusi di sta calata… Ma l’associu di difesa di i diritti di e donne Feminicidi da u cumpagnu o l’ex-cumpagnu, parla ellu di 103 feminicidi in 2023, 113 in 2022, 115 in 2021, 108 in 2020, 158 in 2019, 129 in 2018, 147 in 2017, 133 in 2016. Circate di sapè amichi lettori, ciò ch’elle sò e viulenze fatte à e donne, fate da per voi e vostre ricerche, è truverete mondu artìculi di stampa, è ancu documenti ufficiali, eppuru mai cù e stesse statìstiche ! Cum’hè chì sti sciffri ùn sò micca chjari ? L’associu Feminicidi da u cumpagnu o l’ex-cumpagnu cuntabilizeghja secondu à l’infurmazioni chì pàssanu nant’à a stampa. U ministru ellu, secondu à l’inchieste aperte. Quandu u maritu o u cumpagnu chì tomba a so sposa o a so cumpagna di vita, si tomba anch’ellu, a pulizza o a gendarmerìa chjode l’inchieste, è dunque u feminicidu ùn hè cuntabilizatu postu chì u culpèvule ùn ci hè più mancu ellu ! In quantu à l’inchieste aperte, e forze di pulizza aspèttanu u risultatu di l’inchiesta nanzu d’annunzià u feminicidu. È l’inchiesta pò esse longa…
L’associu NoiTutte ellu cuntabilizeghja tutti i crìmini di gèneru contr’à e donne (un figliolu chì tomba a so mamma per un dettu o un babbu a so figliola). Secondu à stu mètodu sò 134 donne chì sò morte assassinate in 2023.
È a statìstica hè torna sottuvalutata ! Ùn sò micca pigliati in contu e donne marturiate, cundutte o ancu à le volte furzate à u suicidu. Puru, secondu à u Grenelle di e viulenze fatte à e donne, chì s’hè tenutu in 2019 dopu à l’assassiniu di Julie Douib in Calvi, èranu omancu 200 tandu i suicidi di e donne per scappà à e so viulenze cutidiane… Vale à dì, cù più di 100 crimine ogni annu, chì tutti i ghjorni in Francia, omancu una donna more per vìa ch’ella hè maltrattata. È a statìstica hè cresciuta. Secondu à l’Osservatoriu di e viulenze fatte à e donne, sò 229 suicidi cuntabilizati in 2020, 684 in 2021, 759 in 2022 ! Un sciffru tremendu è sempre in crèscita !
Malgratu e misure prese dapoi omancu deci anni, ùn cala micca stu contu macabru. Hà dettu torna u ministru di a ghjustizia di ghjennaghju scorsu, chì frà i 94 feminicidi ch’ellu hà cuntabilizatu, una trentina èranu cunnisciute da e forze di pulizza o di ghjustizia. « Bisogna à migliuraci » dice u ministru, « ùn simu micca abbastanza ràpidu, abbastanza forti, abbastanza à l’ascolta »…
E chjamate nant’à u nùmaru d’urgenza 3919 ùn fàcenu chè cresce, 93.000 in 2022 secondu à l’Osservatoriu di e viulenze fatte à e donne, 98.000 in 2023. In 2022 sò 244.000 e donne vìttime di viulenze in casa. Nant’à 50.000 omi messi in càusa, solu 7500 sò stati cundannati…
E viulenze fatte à e donne chì sò cunnisciute ùn sò chè a parte visìbile di u fenòmenu. I zitelli vìttimi à tempu à a so mamma sò numarosi anch’elli. Suvente un feminicidu s’accumpagna d’un o parechji infanticidi. Sta statìstica ùn hè presa in contu. Quandu u babbu hè viulente, ancu puru s’ella hè ghjunta à staccassi di ssu martoriu a donna, u sistema a custringhje à dà u so indirizzu per vìa di u drittu di guardia di i zitelli. A donna marturiata ùn hè abbastanza prutetta. •