E prime operazione di ripressione anu principiatu. Sempre di listessa manera. A mane à bon’ora, sbrambulendu e porte… « Pulizza ! »… sbulichendu tuttu in casa è in a càmera di u zitellu… pò omu u si porta pè a guardia custoghja… Vi lasciu imaginà u penseru di i parenti, u tremuleghju di a mamma, a còllera di u babbu, u batticore di u giòvanu. Ore sane d’interrugatoriu… i si purteranu in Parigi ? Per avà ùn si sà. Di sicuru a pulizza deve fà u so travagliu, ùn hè micca bè di brusgià empiilozzu è di sciappà materiale… Ma simu dui mesi è mezu dopu à l’agressione barbara contr’à Yvan Colonna, dui mesi dopu à a so morte, è nove giòvani sò stati arrestati pè a so partecipazione à una manifestazione di sustegnu à Yvan Colonna l’11 di marzu scorsu. Frà elli quattru ùn anu diciottani. Li hè rimpruveratu d’avè sciappatu à petrate è coktail molotov vitture è casali di a gendarmeria di Portivechju, senza puru esse entruti nentru. Una decina di vitture serìanu state dannighjate. U precuratore hà fattu sapè ch’elli risichèghjanu sti giòvani sin’à 10 anni di priggiò… Umbeh !... Parte di a Corsica, ùn avemu nutizie di a sèguita ch’ellu hà datu u guvernu à l’agressione contr’à Yvan Colonna. U militente naziunalistu ch’hà sempre mughjatu a so nucenza, ch’hè statu cundannatu à a prigiò à perpetuità malgratu e càriche in difesa chì appughjàvanu a so nucenza è ch’ùn sò mai state pigliate in contu, malgratu u fattu ch’ellu ùn pudìa esse materialmente presente in Aiacciu a sera di l’assassiniu, malgratu i testimognii ch’ùn l’anu micca ricunnisciutu è anu dettu ancu ch’ellu ùn era ellu, malgratu a balìstica ch’ùn accerta micca ch’ellu era ellu à tirà, postu ch’ellu era troppu chjucu, malgratu i membri di u commandò ch’anu affirmatu ch’ellu ùn avìa partecipatu à l’assassiniu, nè soprapiazza, nè durante a preparazione di l’azzione, malgratu e prove telefunine ch’ùn ghjùnghjenu à cunfòndelu.
Stu militente ch’hè statu impriggiunatu durante 19 anni, quasi 20, senza nisun prublema da rimpruveralu, puru ch’hè statu marturiatu in prigiò e prime annate, senza da pudè vede i soi, solu u so avucatu, ammanittatu mani è pedi quand’ellu surtìa à vede u ghjùdice, ch’ùn hà mai più rivistu u cielu di Corsica fora d’un affaccata accurtata pè a ricustituzione ch’ellu avìa chersu durante anni è anni, è chì li hè stata accurdata solu à u terzu prucessu, fora di a presenza di certi attori è quand’ella era troppu tardi da pudè cambià e certitùdine di a ghjustizia culuniale. St’omu chì bramava solu di ritruvà a so machja è e so capre, omancu da pudè esse imprigiunatu in Corsica, da pudè vede più suvente a so moglie, i so figlioli, a so ghjente ciò chì li hè statu illegalmente ricusatu. Stu cristianu mortu in cundizioni atroce, assaltatu daretu à u spinu, tichjatu di colpi in corpu senza pudè difèndesi, assuffucatu cù un saccu di plàsticu, po un stracciu, lasciatu mortu cusì, durante trè settimane ind’è u comà, è ch’ùn s’hè mai svegliatu, po chì s’hè mortu, lasciendu una ghjuventù cummossa, in zerga, rivultata. Averà ghjustizia ellu ? Averemu verità noi ? O u Statu si cuntenteghja di mandà i so sbiri a mane à bon’ora pichjendu in casa… « pulizza ! » per chjode per mesi, forse annate, a ghjuventù corsa ?
Vulemu ghjustizia è verità. •