Face sei mesi ch’ellu hè statu assassinatu u prigiuneru u più survegliatu di Francia in a prigiò « a più sicura di Francia » da un prigiuneru islamistu chì duvìa esse particularmente survegliatu anch’ellu. Malgratu u so cumpurtamentu gattivu in prigiò, malgratu e so malfatte, incendii, agressioni è minaccie contr’à guardiani o altri prigiuneri, l’omu, ch’era statu arrestatu in Afghanistanu da l’Americani à capu d’un gruppu dgiadistu, avìa fattu dui anni in e prigiò americane pò era statu rimessu à a Francia in u 2014… duvìa esse « evaluatu » da un dispusitivu speciale riservatu à i detenuti terruristi islamisti. Ma i rispunsèvuli di a prigiò « a più sicura di Francia » anu ghjudicatu ch’ellu ùn era periculosu, ch’ellu ci vulìa à appruntà a so surtita di prigiò da quì à dui anni, ch’ellu pudìa dunque avè un pìcculu travagliu d’ausiliaru è cusì vince u drittu di pass’è vene cum’ellu vulìa in prigiò… Elong Abe ch’avìa già attaccatu ghjente in prigiò avìa dettu ch’ellu ùn vulìa più vede ne parlà à Yvan Colonna, eppuru omu l’hà lasciatu solu incù ellu senza surveglianza in una sala d’attività. Frà e 49 camerà di a prigiò, quelle chì pudìanu impedisce u massacru ùn èranu brancate o visiunate quellu ghjornu, perch’è ùn si ponu surveglià tutte à tempu, è nimu ùn s’hè avvedu di l’agressione ch’hà duratu 9 longhe minute. U tippu hè surtitu tranquillamentu dopu à a so malfatta, hà palisatu à u guardianu ch’era fora (dunque micca luntanu senza puru avè intesu nunda), chì Yvan si sentìa male. Ci hè vulsutu torna duie longhe minute nanzu ch’elli s’affàcchinu i guardiani à vede ciò ch’ellu avìa Yvan… Elong Abe duvìa pulisce a sala di sport, puru hà lasciatu fora u so carrettu cù prudutti è spazzole, è hà chjosu a porta quand’ellu hè entrutu allora ch’ellu hè pròpiu difesu, senza chì u guardianu di u curridore si stoni è veni à vede ciò chì si passava ind’è sta sala… Tuttu s’hè passatu cum’è sè a fatalità avìa previstu tuttu per ùn dà piazza à l’aleatoriu, cum’è s’ellu era calculatu è orchestratu in u mìnimu ditagliu. U Dìu liccia era partutu à spassighjà quella matina maladetta. Quale a pò crede ? Sei mesi dopu, a diretrice di a prigiò è un guardianu sò appuntati da una « prucedura disciplinaria ». È basta. Sei mesi sò scorsi, è nunda. Solu rimpròveri amministrativi. Umbeh…
Yvan avìa cunfidenza, sperava u so ritornu. Quasi vint’anni dopu, sapìa ch’ellu pudìa vultà in Corsica, chì u statutu di DPS ùn pudìa durà l’eternità. Era liberèvule dapoi un annu. Esse imprigiunatu in Corsica diventava infine una pussibilità. Uni pochi forse, ùn a pudìanu suppurtà… Yvan hè statu tombu à a listessa età chì u prefettu Erignac, 62 anni. Hè statu assaltatu ind’un spinu, cum’è u prefettu. Da un terrurista, cum’è u prefettu… •