Un 4 di lugliu, 19 anni fà, era l’arrestazione d’Yvan Colonna. I primi tempi di a so messa in càusa anu indidatu quant’ellu serìa maltrattatu ind’è l’istruzzione è à longu à a so incarcerazione. Un arrestazione senza tene contu di a presunzione di nucenza, sprezzata di manera stumachente da i trè puteri stituziunali francesi : u putere ghjudiziariu, cù a dichjarazione di u precuratore di a Repùblica, Jean-Pierre Dintilhac, ch’avìa dettu in u 1999 indidentu à Yvan Colonna : « aspettu cù impazienza chì l’assassinu di u prefettu sìa interpellatu » ; u putere legislativu, per vìa di una cummissione senaturiale in càrica di l’affare, ch’avìa scrittu in u so raportu : « u successu di l’inchiesta hè statu appannatu di manera cunsiderèvule da a fughjita di l’assassinu di u prefettu » ; è u putere esecutivu, cù l’annunziu di un ministru di l’interiore, Jean-Pierre Chevènement, d’aostu 1999, parlendu di « l’attu odiosu d’Yvan Colonna », pò, in u 2003, d’un antru ministru di l’Interiore, Nicolas Sarkozy, futuru candidatu à l’elezzione presidenziale, è avucatu di furmazione, ch’avìa annunziatu fieru cum’un paone : « a pulizza francese hà arrestatu Yvon Colonna, l’assassinu di u prefettu Erignac »… Cumu rivene à una ghjustizia « nurmale » dopu à tamanta pressione nant’à l’istruzzione, l’upinione pùblica, i prutagunisti di u drama è a famiglia stessa di u prefettu assassinatu ? U Statu francese à i so più alti livelli, hà fabricatu u culpèvule ch’ellu abbisugnava è tutti, da i ghjurnalisti (ammentèmuci a prima pàgina di France-Soir u 26 di maghju 1999 cù a so fottò è u tìtulu : « Wanted, tueur de préfet », u ghjornu di l’arrestazione di u commandò Erignac) ; a pulizza, ben intesa, chì sbuciarda à i membri di u commandò a culpabilità d’Yvan Colonna cum’è dà retta à ciò ch’ellu avìa affirmatu u Statu in tutte e so cumpunente ; i ghjùdici è tutti i servizii di l’antiterrurìsimu ; è disgraziosamente i membri stessi di u commandò è e so moglie, messi sott’à a pressione di e so prime dichjarazioni. Malgratu u dinegu d’Yvan, mondu volte ripetutu, malgratu e prove in favore di Yvan Colonna, malgratu a qualità di a so difesa, malgratu mondu testimogni per accertà ciò ch’ellu dicìa, malgratu i testimogni di i fatti u 6 di ferraghju di u 1998, ch’anu vistu l’assassinu è anu sempre accertatu ch’Yvan Colonna ùn era u tirore, malgratu e custatazioni di a balistica chì cunfirma chì u tirore ùn pudìa micca esse Yvan Colonna, troppu chjucu per raportu à u prefettu chì cullava una pèndita, malgratu u drittu, malgratu i trè prucessi, malgratu e manipulazioni è e bugìe di l’inchiesta, palisate durante à ssi prucessi, malgratu u fattu chì Yvan ùn hà mai stanciatu di mughjà a so nucenza, ùn hè ghjuntu à cuntrà ssu scàndalu ghjudiziariu di e prim’ore di a so arrestazione. Vistu a stampa è i putachji già sparsi in tutta a Corsica, hà decisu di piglia « rinculu », cum’ellu spieca tandu. Ma più firmava ind’è a machja, è più diventava fàciule à u Statu d’indidalu cum’è un culpèvule ideale per tutti. Oghje hè mortu, assassinatu anch’ellu è di manera atroce. Cunvene à tutti sti curnachjoni ch’ellu ùn ci sìa più. Puru, ùn ci si pò esse discussioni appaciate cù u Statu, è a Corsica ùn puderà inventassi un avvene fin’tantu ch’ellu ùn ci serà statu ghjustizia è verità per Yvan Colonna. •