«Scelta para per rifà, di a Corsica un giardinu »… cusì dice u bellìssimu cantu di I Muvrini ! I Muvrini chì si sò impegnati dapoi più di quarant’anni à rinvivisce u cantu è a cultura corsa, ma dinù à custruisce una Corsica più bella, più sulidaria, più pulita, più corsa. Fàcenu a pulìtica à u sensu u più nòbile cù passucci cutidiani incaminènduci nant’à e strade d’un avvene riacquistatu. Cusì sò e so iniziative cù a Fundazione Umani ch’ùn pudìa purtà più bellu nome. Luttà contr’à a viulenza, pè a vita, per l’omi, rinvivisce u castagnetu, i sapè fà nustrali, a lingua corsa, è sempliciamente l’umanità, eccu i scopi di a Fundazione di Corsica Umani ! Una chjama à prugetti hè stata cusì lanciata. « Pruduce ciò chì si manghja, manghjà ciò chì si pruduce. » Sè v’avete un pezzu di terra, sè vo site in famiglia, o solu, sè vo vulete stallavi cum’agricultore, sè vo site paisanu bio, sè vo site un cullettivu citatinu, un associu, un AMAP chì prumove l’agricultura paisana, una cunfraternità, una ghjesgia, un cunventu, una scola, un cullegiu, un liceu, una cullettività, una cumuna… tutti, site cuncernati da ssa chjama !
U scopu hè d’incuragisce à pruduce di manera durèvule è bio. « 20 o 30 anni fà, dice Ghjuvan’Francescu Bernardini, presidente di a Fundazione Umani, a Corsica cuntava 30 à 40 orti è arbureti ogni cumuna. Sò sempre scritte in u catastru è èranu u spinursale di a nostra terra. Oghje, 20 à 30.000 pìccule spluttazioni pruduttive sò abandunate cum’è tante usine di vita ch’anu chjosu… » Umani dinunzia sta pèrdita di richezza, di sapè fà, u scuragime di e vucazioni, a pressione fundaria, è cun què, i perìculi di a pèrdita di a qualità ind’è ciò chè no manghjemu, a truncatura di e lee suciale, a pèrdita di a salute. L’agricultura corsa ùn raprisenta più chè 2,5 % di u nostru Pruduttu interiore bruttu (vale à dì a richezza ecunòmica d’un paese) è ùn hà chè 4 % di capacità à nutrisce a so ghjente, malgratu a richezza di a nostra terra è tutte e so putenzialità ! Cusì Umani chjama à un operata paisana, chjamata 1000 orti, 1000 giardini ! Invita à un slanciu citatinu da rimette in cultura mondu terre oghje à l’abandonnu. Cumu ? Custruisce e rete paisane di scambiu, di pràtiche, di sulidarità. Fà scuntrà e sperienze, urganizà furmazioni, assucià l’energìe benevulenti, mette in lea a ghjente. Prutege i biotopi, scambiassi e sumente, ritruvà e varietà lucale, sparghje e pràtiche di ricuperazione di l’acqua di u cielu, fabricà u cumpostu per riduce i rifiuti alimentarii è nutrisce a terra, insetà l’àrburi, creà bugni, arnie, pullinaghji… Materiali, accessu à l’acqua, cumprera di sumente, piante o animali, umani s’ingaggia à sustene i prugetti à longu à dui anni, mettendu manu in stacca sin’à 100.000 àuri secondu à i prugetti. Sola cundizione, pruduce durèvule, cù e pràtiche di l’agrueculugìa. Bellìssima iniziativa ! Partecipàteci !