Rivultatu contr’à u fattu d’avè mantenutu l’elezzioni municipale u 15 di marzu scorsu, u duttore Francescu Agostini di Calinzana, vicipresidente di l’Unione Regiunale di i Prufessioni di a Salute, à capu di u centru medicale di Calvi- Balagna hè impenseritu assai di a situazione in Balagna. Un mortu è già 14 personi cuntaminate in Lìsula frà e quale parechje sò state uspitalizate.
«U vènari nanzu à l’elezzione, èramu rivultati per vìa di u mantenimentu di l’elezzioni, avemu fattu sapè a nostra inchietùdine è u bisognu di mette in ballu in furia un Centru Covid19 in Lìsula » dice u duttore Agostini chì teme i quìndeci ghjorni à vene per raportu à a cuntaminazione. « Sapìamu chì ss’elezzioni èranu una bomba à ritardamentu. Per disgrazia avìamu a ragiò. » A Corsica cum’è a Francia manca di materiale di prutezzione, maschi, guanti, ghjalatina.
A Cullettività di Corsica scumbatte à dritta è à manca da pudè parà l’urgenze. Tamanti sforzi chì fàcenu miràculi. U bisognu di prutege a ghjente, è pè u più i persunali medicali o suciale, hè imperativu. U prufessore George Gao, direttore generale di u Centru chinese di cuntrolu è di prevenzione di e malatìe hè à capu di un centru di ricerca nant’à u SarsCov-2 rispunsèvule di a malatìa Covid19. A dice netta : «U sbagliu tamantu di i Stati Uniti è di l’Auropa hè chì a pupulazione ùn porta micca mascu. Ssu virus si trasmette cù e gucciette respiratorie trà ghjente. E gucciette ghjòcanu un rolu impurtante assai. Hè per quessa ch’ellu ci vole à purtà un mascu. U sèmplice fattu di parlà pò trasmette a malatìa. Parechje personi cuntaminate sò senza sintomi, cù un mascu, si pò impedisce e gucciette chì traspòrtanu u virus di cuntaminà altre personi. » Avemu quì ind’e sse duie prese di parole, i dui vettori indispensèvuli per luttà contr’à a prupagazione di a malatìa, u cunfinamentu è u materiale di prutezzione, maschi è guanti. U primu gestu d’amore è di sulidarità à fà pè i vostri è pè a ghjente in generale sò quessi quì. Fin’tantu ch’ùn l’averemu capita, fin’tantu chì l’autorità ùn ne feranu una priurità, u Covid19 cuntinuerà à spàrghjesi. U presidente di l’Esecutivu corsu l’hà sappiutu prestu. Hè statu frà i primi à circà di fà fronte à sta « guerra ». Dumandendu u riportu di l’elezzioni municipali, fendu valè u so rolu di presidente di l’Esecutivu per prutegge a pupulazione, invece di i so interessi di candidatu.
Dapoi e prime inchietùdine, scumbatte da truvà i mezi di parà u Covid19 in Corsica. Franchendu e lìmite di e so cumpetenze, a so cummanda di 2 millioni di maschi ghjunghjerà nanzu à a quella di u guvernu. Aiutàteci à luttà. Stàtevine in casa, è per quelli chì dèvenu sorte per vìa d’un travagliu d’interessu cullettivu, rispettate e cunsigne di distanziazione. Aiutèmuci.
Fabiana Giovannini.