À chì ne simu di u climà ? È più precisamente di l’azzione « l’affare di u sèculu » ? Hè a parte francese di una dinàmica mundiale per dinunzià l’inazzione climàtica di i guverni di pettu à l’urgenza. Cusì, l’affare di u sèculu ch’adunisce dapoi 2018 parechje ONG cum’è Notre Affaire à Tous, a Fondation pour la Nature et l’Homme (FNH), Greenpeace France è Oxfam France, avìa postu una lagnanza in ghjustizia. Oghje l’affare di u sèculu sò 40 urganisazioni è più di 2,3 millioni di citatini à avè zifrattu una petizione di sustegnu.
Di fatti, u 14 d’ottobre 2021, u Statu francese hè statu cundannatu pè i so mancamenti in a lotta contr’à u ciambuttamentu climàticu. U Cunsigliu di Statu hà cunfirmatu sta cundanna, dumandandu à u Statu francese di piglià « tutte e misure ùtile » da rimette a Francia nant’à una strada bona nanzu à u 31 di marzu 2022. U 10 di maghju 2023, u Cunsigliu di Statu hà ramentatu torna u so ghjudicamentu è custatatu chì i ministeri incaricati di a transizione eculògica ùn avìanu ancu presu e misure ch’ellu ci vulìa da tuccà l’obbiettivi di redduzzione di 40 % di i gasi à effettu di serra in 2030. U Statu era piazzatu « sott’à surveglianza rinfurzata », ci dicìa l’affare di u sèculu. U 31 di dicembre 2022, s’hè compiu u tempu lasciatu da a ghjustizia à u Statu francese per richjappà ssu ritardu climàticu. L’affare di u sèculu hà decisu tandu d’attaccalu torna à u Tribunale di ghjugnu scorsu da ch’ellu sanzioni ssu ritardu. Ma, disgraziosamente, u 22 di dicembre, u Tribunale amministrativu di Parigi hà cunsideratu chì u Statu avìa fattu abbastanza. Puru, l’affare di u sèculu ùn sfiata micca. Hà decisu di fà appellu. 2024 serà un annata impurtante pè u climà. 2022 hè stata un annata gattiva in Francia cù una sicchina tremenda è incèndii catastròfichi. 2023 hà cunnisciutu torna livelli stremi di temperatura, seguitati da tempurali è inundazioni ch’ùn ne finìscenu più in u nordu di a Francia. Sè u Statu hà messu in ballu parechje lege per luttà contr’à u guasteghju di l’energìa è contr’à l’emissioni di gasi à effettu di serra nè l’alloghju o a mubilità, ùn basta micca. Ci tocca à mette di più soldi è vuluntà per riesce i novi ubbiettivi di menu di 50 % d’emissioni da quì à u 2030 per raportu à l’annate 1990. U scopu hè di ghjunghje à a neutralità carbonu da quì à u 2050. Vale à dì quant’ellu ci vole à multiplicà u rìtimu annuale di e redduzzioni d’emissioni di carbonu ! U guvernu prevede di purtà u bugettu di a pianificazione eculògica à 40 milliardi d’auri è di rispunsabilizà e regioni cù u Fondu Verde chì prevede d’accumpagnà l’imprese è e cullettività in e so pulìtiche di subrietà energètica. Puru… secondu tutte e previsioni, u riscaldimentu serà di 2 gradi da quì à 2030 in Francia, è ancu di più. « Ghjè quasi inevitèvule » hà dettu l’Altu Cunsigliu pè u climà. « U rìtimu di e redduzzioni di l’emission ùn basta micca in tutti i settori per ghjunghje à l’obbiettivi di u “Fit for 55” da quì à 2030 fora di u casamentu » hà dettu torna l’Altu Cunsigliu, chjamendu torna u Statu à fà di più.
È cum’è u restu di l’Auropa, a Francia si riscalda più in fùria chì u restu di a pianetta… •
Fabiana Giovannini.
* Fit for 55 : obbiettivi di redduzzioni imposti da l’Unione aurupea.