U 5 di dicembre scorsu, u Sindicatu di a magistratura hà publicatu un inchiesta rializata nant’à e viulenze sessiste è sessuale à u senu di l’istituzione ghjudiziaria. Ghjùdici è persunali di ghjustizia anu ricevuti un quistiunariu è l’iniziativa hè una rivuluzione !
972 personi anu rispostu, frà elle 525 risposte sane è 447 parziale. U risultatu di l’inchiesta hà di chè impremurisce assai nant’à a capacità di l’istituzione à ghjudicà di manera ghjusta e viulenze sessiste è sessuale, à appiecà a lege ch’ella deve guarantisce, è à fà rispettà i documenti internaziunali cum’è a Cunvenzione aurupea di i diritti di l’omu, a Cunvenzione di l’ONU per l’eliminazione di e discriminazioni contr’à e donne (Cedaw), è di manera generale à fà ricunnosce è rispettà i diritti fundimentali di e donne.
L’inchiesta cunferma chì a sucetà hè polluata da a cultura di u viol. 9 % di l’interrugati si dìcenu vìttime, è 15 % testimogni di viulenze sessiste o sessuale, à parechje volte. 82,5 % di e vìttime sò donne. 91,6 % di l’agressori sò omi. 70 % di l’agressori èranu superiori di e so vìttime. Frà l’atti dinunziati, ci hè esibiziunìsimu, insulte di caràtteru sessuale, prupòsiti sessualizati, parulle denigrante o chì ridùcenu a vìttima à u so gèneru, prupòsiti è cumpurtamenti omofobi o transfobi, prupòsiti o cumpurtamenti misogini. Sò dinunziati fastidii cù vindette prufessiunale sè a vìttima si difende. E donne incinte o chì anu l’età d’esse incinta sò discriminate è e so capacità prufessiunale rimesse in càusa. Cumpurtamenti misogini dinù sò dinunziati à l’incontru di ghjustizièvuli. L’inchiesta rivella una banalisazione di sti fatti, un mancu di sensibilisazione è di denunziazione di sse viulenze è un mancu di presa in càrica quand’elle sò signalate. Di manera generale, l’inerzìa di l’istituzione hè custatata di pettu à tutti sti fatti.
U fattu chì ciò ch’hè dinunziatu à u senu di a sucetà hè dinù custatatu à u senu di l’istituzione ghjudiziaria chì deve scumbàttela, ci dice quant’ella hè longa a strada per rifurmà sta sucetà è sbarrazzassi di ste viulenze. L’associu Coudes à Coudes (un associu di « resistenza » chì difende i diritti di a ghjente è vole sviluppà u dibàttitu demucràticu), dinunzia « a rispunsabilità di a magistratura ind’è l’inaccetèvule bilanciu di 1,7 %, u sciffru neru di a ripressione di i viol in Francia ».L’associu dumanda un inchiesta apprufundita è ne chjama à u ministru di a Ghjustizia cù misure di lotta è di furmazione da mette in ballu. Una chjama ziffrata da persunalità, eletti, sindicati, associ, partiti pulìtichi. « Sette ricorsi contr’à e mancanze pisìe di tutta a catena penale per reprimà i viol (in particulare u travagliu di i magistrati) sò di pettu à a Corte aurupea di i diritti di l’omu » dice dinù Coudes à Coudes. S’aspetta frà pocu a decisione di a CEDH.
U raportu resu dopu à l’inchiesta si chjama : « Tuttu u tribunale hà a voglia di viulentati – Nota annant’à e viulenze sessiste è sessuale ind’è l’istituzione ghjudiziaria ». Prupone misure per luttà contr’à ste viulenze per migliurà a prevenzione, a presa in càrica di e vìttime, a furmazione di i magistrati, apre lochi d’accolte è mette in ballu misure per prutege i persunali.
Dice u Sindicatu di a magistratura chì ssu raportu hà per scopu « d’apre novi dibàttiti è inizià scambiamenti pè i persunali di ghjustizia ma dinù – è sopratuttu – pè i ghjustizièvuli ch’aspèttanu di manera leghjìttima una risposta à livellu di l’inghjochi pè a nostra sucetà ». Fùssila puru. •