Frà e cummemurazioni di a settimana scorsa, di sicuru quella di a tremenda tumbera di a grande guerra di u 14. 10 millioni di morti. Senza cuntà i millioni di struppiati, di feriti, di famiglie addulurite, di vite arruinate… in Francia sò morti l’ùltimi piluti ma u ricordu ci hè sempre, ancu sè i documentarii anu invechjati, e stampe si scancèllenu è e nove generazioni anu persu i babboni per cuntalli tamanta disgrazia umana. In Corsica a ferita hè sempre aperta di tanti babbi, zìi, figlioli morti in guerra. Oghje u guvernu cerca à spenghje l’ùltima memoria di e cummemurazioni cacciendu ssu ghjornu di riposu per dà un pocu di soldu à u so bugettu in desequillìbriu. U ricordu pocu à pocu si sguasserà cum’è sse vechje fottò…
Ma ci hè stata dinù un antra cummemurazione, di menu ammentata, eppuru ! U 9 di nuvembre hè un ghjornu festivu ellu, quandu in u 1989 i Berlinesi anu smuntatu u muru chì spiccava l’Allemagna di l’Ueste à quella di l’Este dapoi u 1961. Era frà l’ùltime vistiche di un antra guerra tremenda, a seconda, cù l’atrocità di u nazìsimu d’una parte, è l’atrocità di u cumunìsimu dopu, pò di a guerra fredda trà l’uni è l’altri ch’hà impeditu l’Allemani di l’Este à fughje à l’Ueste… A caduta di u muru di Berlinu hè a sèguita di quella di e repùbliche soviètiche è di a fine di a guerra fredda trà l’Ueste è l’Este di u mondu. Una rivuluzione pacìfica ghjunta da un antra pulìtica iniziata da Gorbatchev chì cerca à àpresi prugressivamente à l’Occidente per vìa di a crisa ecunòmica chì u mena. A verità hè ch’ellu ùn ghjunghje più à ritene i pòpuli in brama di libertà. A Pologna, l’Ungrìa, dinù l’Ucràinia, i stati di Iugoslavìa, ecc… si stàccanu pocu à pocu. In Allemagna di l’Este a cuntestazione hè di più in più forte, cù manifestazioni da tutte e mamme. A mundialisazione hà guadantu, l’infurmazioni fìltranu d’un mondu chì cambia, i spurtivi o l’artisiti chì fàcenu u passu è vene per vìa di cumpetizioni o cuncerti ne testimògnanu, u pòpulu face a so rivuluzione, ùn stà più à sente i guverni chì pruvàvanu sin’à avà à mantèneli sott’à cuntrollu… Hè u tempu di a perestroïka, vale à dì u mondu à rifà, u paese da ricustruisce… e riforme ecunòmiche, tecnulògiche, suciale è ancu demucràtiche si seguìtanu, vòltanu ancu mondu prigiuneri di i goulags ! A libertà d’infurmazione è di spressione (a glasnost) s’impone pianu pianu anch’ella cù l’accidente di Cernobile induve u secretu hà fattu tantu è tantu disguastu… Ma sò evuluzioni longhe, aspre è impastughjate à mezu à resistenze pisìe d’un bloccu cumunista ch’ùn vole evuluà da troppu gruppi d’interessi è currotti à l’internu, è un mondu ciambuttatu à l’infora trà a guerra d’Afaganistanu, a crisa di l’euromissili, a corsa à u nucleariu, a cunquista spaziale, e sfide senza fine trà americani è rùssii… a guerra fredda face a resistenza ancu avà.
Stu 9 di nuvembre dunque, in un slanciu di gioia scema, i Berlinesi di l’Este è di l’Ueste vanu à strughje u muru di a vergogna chì spiccava u paese è famiglie sane. Onore hè resu à i 140 morti ch’anu vulsutu francalu. Hè festa quella notte, abbracciate è allegrìa, sò strutti in i ghjorni dopu i 155 chilòmetri è i 302 miradori. Mumenti beati !
Eppuru… sò sempre decine di paesi in u mondu, in Corea, in Cisjordanìa, in Palestina, in Amèrica à a fruntiera di u Messicu… induve muri spìccanu sempre l’omi… •