Hè statu un bell’anniversariu. Una festa sèmplice ma carca à emuzioni à l’imàgine di ciò ch’ellu hè Arritti. Una bella festa di famiglia, cù ghjente cuntenti di ritruvassi, ricordi, umagi, rinforzi, allegrìa è cuntentezze d’avè francatu l’anni è i tràmpali, sempre arrittu per bramà speranze d’avvene… Di sicuru, ci hè vulsutu fà un sforzu per dà di pettu à ssa scumessa di festighjà cum’ellu si deve ssi 50 anni.
Ancu assai, oghje a rilleva si face pocu à pocu. Ci sò scrittori regulari cum’è Roccu o Marina chì ci aiùtanu assai, è rinfòrzanu a squadra sin’avà cumposta di Màssimu, Francescu o eiu. Qualchi altru a si pròvanu à scrive torna, Antonia, Ghjulia, Ghjuvan’Francescu, Rumanu… Eppò Matteu è Ànghjulu ch’anu pigliatu a mo sèguita à a gestione di u settimanale.
Per noi, hè un bùffulu d’aria puru tuttu ssu sustegnu! Arritti hà un mezu sèculu di vita ma hè firmatu militente. Hè a so forza è a so carca affettiva dinù. Hè cusì ch’ellu hà francatu l’anni. A so festa stu sàbatu in Bastia hè stata di stessa andatura chì a so nàscita : una scumessa militente.
Mi tocca à ringrazià quì tutti quelli ch’anu messu a manu in pasta da ch’ella sìa una bella rièscita a so festa. Antonia, Matteu, Ànghjulu, ch’anu datu di pettu à tutte e difficultà per truvà suluzioni è cuurdunnà e squadre di travagliu. Ghjulia, Ghjuvan’Clàudiu, Remondu, Egidiu, Sergiu, Ivana, Dumè, Ghirardu, Tumasgiu, Emma, Curina, Anna Maria è uni pochi d’altri… si ricunnosceranu. Eppò Miché, ben intesa, Carina è Sebastianu, i nostri amichi di sempre di a squadra di i Fratelli Angeli chì fàcenu parte di a vita d’Arritti dapoi sempre.
Minicale è Ghjiseppu Turchini ci anu rigalatu un spetàculu magnìficu, incantendu u pùblicu. Pasquale hà messu a so manu per illustrà di fottò è d’archivi e bellìssime canzone ch’anu cuntatu a nostra stòria. Liunellu ci hà rigalatu u muntagiu di i filmi d’archivi da ramentà tuttu u pesu stòricu di l’evenimentu. Vanina hà messu a so manu per rializà i nostri pannelli è i documenti di cumunicazione, un bellu travagliu dinù cumplettatu da l’amichi di sempre di a stamperia Sammarcelli ! Uni pochi d’altri stampitori anu partecipatu, Publi 2B, Bastia publicité è Lisandru Giamarchi di Com and Co. Ben hà datu u so colpu di manu à a rialisazione di u situ chì ci face francà una tappa nova. Marcu, u nostru fottograffu ch’hà stallatu un veru studio fottò ci hà fattu un bellu rigalu dinù partecipendu à l’animazione di sta ghjurnata.
Infine, tanti ringrazii dinù à i nostri sustegni d’impresa, pè a so publicità ma dinù per i doni di prudutti: Domaine d’Orsini, Domaine Giacometti, Domaine Casabianca, Battì Arena, Pietra, l’Acqua d’Orezza, Damiani, Ottavy A Filetta, è parechji altri ! I nostri invitati ci anu purtatu assai da a so presenza è i so discorsi. Tatiana hè ghjunta à porghje u sustegnu di l’Alleanza Lìbera Aurupea ch’ùn si pudìa fà senza u s’aiutu. Infine chì, Arritti hà 50 anni di vita perch’è si pò vantà di ssu stintu militente à longu à a so stòria. L’hà palisatu torna ss’anniversariu. Ghjè u so mutore è ciò chì face ch’ellu si scrive in u filu d’una lotta stòrica. À tutti, da u fondu di u core, tanti ringrazii è à prestu per d’altri mumentoni da campà inseme!