Dopu à un morte è una quindecina di feriti in Francia sta settimana, hà dettu a nova ministra di a Transizione eculugica è di a cuesione di i territorii ch’ellu ci volerà addattà l’infrastrutture per vìa di u riscaldimentu climàticu. « Hè scarsu d’avè 65 dipartimenti tocchi à tempu da u tempurale, accade dopu à una perioda di sicchina » hà spiecatu a ministra. « Ci vole menu astracu, prutege a terra… In u 2021, 80 % di u territoriu hà avutu un episodiu di cutrura è stu mese di maghju pate d’una sicchina stòrica… Di sicuru ci vole à agisce… ci vole à custruisce di manera sfarente, isulà l’alloghji, riduce e nostre cunsummazioni elèttriche… Chjamu tutti i Francesi à ùn apprudà troppu a so climatisazione »… Umbeh ! Di sicuru, tutt’ognunu deve fà sforzi ma quantunque… a chjama hè ardita. Certi a truveranu forse ancu pruvucatrice. Ammentemu chì u guvernu di Emmanuelle Macron hè statu cundannatu per inazzione climàtica, per vìa ch’ellu ùn hà tenutu l’ingaggiamenti ch’ellu avìa presu di riduce e so emissioni di gasu à effettu di serra. Di sicura Amélie di Montchalin ùn ci era ind’è ssu guvernu postu ch’ella s’affacca avà, ma a ministra manca quantunque di pedagugìa. Averà pocu leghjitimità à dà lezziò dinù. L’associu Agir pour l’environnement l’hà classificata 594a nant’à 648 deputati per vìa di i so voti à l’Assemblea naziunale cuncernendu l’ambiente. Hà vutatu contr’à l’interdizzione di u glifosatu, contru l’arrestu d’utilisazione di l’oliu di palma, contr’à l’indennizazione di e vìttime di i pesticidii, contr’à l’interdizzione di ssi pesticidii à cantu à l’abitazioni… allora, rimpruverà à a ghjente d’utilizà troppu i so climatizadori… pare un pocu sprupusitatu, nò ? Quandu u mondu urganizeghja Ghjochi Olìmpichi d’inguernu cù neve artificiale, o una cuppa di u mondu di pallò sott’à i suleoni d’un paese induv’ellu face 50 gradi u ghjornu, custrettu, per fà calà a timperatura di custruisce stadii cù climatisazione… quand’omu lascià vulà aviò o navigà battelloni à viotu, quand’ellu si face vene pumate, prasche o limoni da l’altra parte di u mondu franchèndusi millaie di chilòmetri… hè quantunque diffìciule di dì à a ghjente spinghjite i vostri lumi è calate i vostri climatizadori. Più s’ingattivisce a situazione di u climà, menu si pìglianu misure per riduce l’emissioni di gasu à effettu di serra, è più si diciuleghja nant’à u riscaldimentu climàticu. Secondu à a Nasà, ùn si puderà più campà ind’è parechji lochi di a pianetta per vìa di u riscaldimentu climàtichu da quì à 30 anni, è forse di menu. Sò centinaie di millioni e pupulazioni cuncernate. U mischiu trà timperature streme è umidità di l’aria fà chì a pella umana ùn pò più suddà per addattà a timperatura curpurale. Un omu ch’ùn pò più suddà pò more in un lampu. « Vi desidratate, l’organi umani, in particulare u core, subìscenu un stress. U sangue accore à livellu di a pella per pruvà di liberassi di u calore, viutendu di sangue l’organi interni. E cunsequenze sò fatale » dìcenu l’esperti di a Nasà. Cuntinuemu cusì ! •