Hè cumplessa l’ànima d’un pòpulu. Cumu l’omu pò esse cusì impenseritu di e suffrenze di u mondu, inchietu di a guerra vicina, di u ciambuttamentu climàticu chì mena, di a precarità ch’avvanza, è ùn ghjunghje à truvà e suluzioni per travaglià à un mondu più bellu ? L’ambiente hè frà l’inchietùdine e più forte di a ghjente in u mondu. Riscaldimentu climàticu, acidificazione di l’oceani, pèrdita di a biodiversità, destruzzione di u vivu, avvilimentu di l’aria, rarificazione di l’acqua, destruzzioni di e fureste, strughjitura di i ghjacciaghji, crèscita di u livellu di i mari, sparizioni di e spèzie animale, cataclìsimi da tutte e mamme… ugnunu n’hè cuscente è impenseritu. Zifremu e petizioni, demmu ancu i soldi per sustene e lotte di l’associi, eppuru… quand’omu hà a pussibilità inseme di cambià di versu, o omancu di mandà un messagiu chjaru nant’à ciò chì tutt’ugnunu chjama a più grande scumessa di l’Umanità… ùn ghjunghjimu à lampà ssu mughju per priserve a vita. Ùn hè nè caggione di candidati o di partiti chì ghjudichemu più in capacità o nò, ghjè solu ch’ellu ci hè cumu un ricusu d’agisce à stu livellu. Ghjè cumu quand’omu hà a paura d’andà à vede u duttore è li rincrese di fà l’esami necessarii chì li ponu amparà una gattiva nutizia. Hè a cumplessità di l’èssere umanu ! U 4 d’aprile scorsu, u GIEC fecìa cunnosce u so ùltimu raportu torna più penserosu chè i primi. Per tuccà u livellu di riscaldimentu glubale di 1,5 gradu, ùn ferma più chè trè anni à l’Umanità per piglià e misure chì ponu fà piantà a crèscita di ssu riscaldimentu. U scopu hè di ghjunghje à un livellu d’emissioni di gasu à effettu di serra in 2025, pò di sminuìscele di 45 % da quì à 2030 per raportu à l’emissioni di u 2019. À livellu di u citatinu li pare un scopu inaccessìbile è si chjode à un sforzu cullettivu. Puru, l’esperti mundiali ùn travàglianu micca solu nant’à i custati di catastrofa. Prupònenu. Indìzianu suluzioni. Basta à vulè mèttele in pràtica. Face un sèculu è più chì scientìfichi, omi ingeniosi è militenti di a càusa ambientale ci travàglianu. E suluzioni ch’ùn distùrbanu micca u nostru cutidianu esìstenu. Sò ancu andature nove chì tòccanu altre prublemàtiche, cum’è a lotta contr’à l’inghjustizie suciale, a creazione d’impiechi valurizati, l’ameliorazione di u nostru ambiu di vita, è ancu di u nostru purtaflogliu. Allora, perch’è ssu messagiu ùn hè micca intesu ? Hè stranu. L’ùltimu raportu di u GIEC spieca ch’ellu ci tocca avà, micca solu à riduce e nostre emissioni carboni, ma dinù à caccià ind’è l’aria u CO2 ch’hè statu già sputatu. L’omu hè ingeniosu è inventa tècniche ancu quì. Cumu ? Piantendu fureste à altu livellu. Ci volerebbe 322 millioni d’èttari da quì à u 2050, vale à dì una furesta grande cum’è l’Ìndia per un dettu. Una manera di cumpensà i 420 millioni d’èttari di fureste strutte da u 1990 à u 2020… Dinù ci volerebbe à risturà spazii naturali cum’è e mangrove o i prati, ammanuglià carbonu in a terra cù certe tècniche agrìcule, ricuperà ind’è l’atmosfera u CO2 per iniettalu in fondu di a terra. Esìstenu già unità industriale per fà què, a più maiò si trova in Islanda. U prublema hè ch’ella mette un annu à assorbe ciò ch’ella sputa in qualchi seconda l’Umanità… Ma sò tècniche chì prugrèssanu. Ci volerebbe di più incuragimi è soldi per dà di pettu à tuttu què. Ci volerebbe dunque i citatini più rivendicativi à pressu à i so guverni. Ci volerebbe ghjente cù a vuluntà di purtà sse pulìtiche. A Francia hè già assai in ritardu nant’à tuttu què. È s’hè presa u 10 d’aprile scorsu torna cinqu’anni omancu di ritardu… •