L’industriali è e multinaziunale di i pesticìdii sò cum’è a saetta, s’omu i fà sorte pè a porta, èntrenu pè a finestra ! Face anni chì l’associ di difesa di l’ambiente cum’è Agir pour l’Environnement scumbàttenu per l’interdizzione di i famosi neonicotinoìdi in u trattamentu di e sumente di ràvane. Sò insetticìdii periculosi per l’insetti pullinisatori, è ancu pè a saluta umana. Eppuru a sucietà Bayer, a più accanita frà l’industriali, vene d’ottene una derugazione di u ministeru di l’Agricultura pè u trattamentu di e ràvane à zùccheru. L’Agenzia naziunale di securità sanitaria (Anses) dice di ssu pruduttu chjamatu u Movento ch’ellu hè « periculosu per l’ape », « ch’ùn ci vole micca appiecalu quandu l’avvintìcci sò in fiore », ch’ellu hè « periculosu per l’ambiente acquàticu » è « tossicu pè a ripruduzzione », o torna ch’ellu risicheghja di « nuce à i vembrioni »… « Ghjè un veru scàndalu ! U ministeru di l’agruchimìa riparte in guerra contr’à l’ape autorizendu in Francia un insetticìdiu chì pratende luttà contr’à l’ingiallimentu di a ràvana allora chì i pruduttori stessi di ràvane dìcenu ssu pruduttu caru è pocu efficace » cumenta Agir pour l’Environnement, chì dinunzia « un ecucìdiu insuppurtèvule ». L’associu di difesa di l’ambiente parte in campagna è chjama a ghjente à sustènelu. Sparghje kit* cù « bombe à sumente » di fiori nettariferi per aiutà l’ape à nutrìscesi. Sò cusì 100.000 bombe chì saranu distribuite quist’annu. Face 8 anni chì s’azzione hè cundutta è sò già 50.000 di ssi spàzii detti « zone di bzzz » chì sò state creati. A ghjente hè invitata à sparghje in i so orti, in i campi, nant’à i so balconi ste sumente di fiori, è diventà cusì « difensori di u vivu ».
Agir pour l’Environnement hè un associu chì face pressione nant’à i rispunsèvuli pulìtichi è ecunòmichi cù campagne di sensibilisazione è d’azzione citatine. Conta più di 20.000 membri è ricusa u mìnimu finanziamentu di i puteri pùblichi per firmà lìberi è indipendenti. Vale à dì campa solu di e so azzioni è di l’aiutu di a ghjente.
Cù u ciambutamentu climàticu, l’urbanisazione, i sepali sradicati, e pràtiche agrìcule intensive, a monocultura è a multiplicazione di i pesticìdii, e pupulazione d’insetti si sfòndanu, frà i quali l’insetti detti pullinisatori chì ghjòcanu un rolu impurtantìssimu per pullinisà frutti è legumi. In trent’anni, quasi i trè quarti di l’insetti sò spariti. Basta à vede i vetri di e vitture cum’elli sò oghje puliti ! Eppuru, face già 60 anni chì l’eculugisti alèrtanu nant’à stu perìculu. A sparizione di l’ape hè 100 à 1000 volte più impurtante secondu à e regioni. A pullinisazione hè indispensèvule à a vita. 90 % di e piante à fiore in u mondu è 75 % di e culture, dipèndenu di l’ape. 35 % di i pullinisatori chì fèrmanu sò minacciati di sparizione. L’ape sò sintinelle di a biodiversità è di l’ecusistemi. Senza sse travagliatrice e racolte mundiale pè a cunsumazione umane sò in perìculu. A preservazione di l’ape è di i so lochi di vita deve esse una priurità. S’elle vènenu à sparisce, si dice « chì l’Umanità ùn averebbe più chè quatru anni per campà ». •
Fabiana Giovannini.