U blog di u National Geographic di ssu mese di ghjennaghju ci conta un evenimentu chì duverebbe fà riflette l’omi. Ronan Donovan hè biologistu è fottografu, ci conta a sperienza ch’ellu hà campatu in Uganda di pettu à scìmie infuriate. Dice u National Geographic : « Testimognu di a paura, di u dolu è in fine di contu di a rassegnazione à misura ch’elli pèrdenu i so lochi di vita, i scimpanzé sò custrinti ad attaccassi à e case d’un pìcculu paese »… Ugnunu di sicuru si ramenta u filmu famosu cù u lucente attore Charlton Heston, « A pianetta di e scìmie »… l’omi sò cusì pocu rispettosi di l’altre spèzie animale, ch’ellu i porta à vultassi contr’à ellu è sò, per disgrazia, i nucenti à pagà. U fottografu conta quant’ellu era abituatu à avvicinà i scimpanzé, da fanne ritratti senza piattassi à mezu à decine di ss’animali. Puru, in u 2017, li hè ghjunta a paura pè a prima volta frà tutte e missioni cumpite sinamente à avà, è pè a prima volta s’hè piattatu per pigliali in fottò, spaventèndusi di ciò ch’ellu vidìa. « Aghju pussutu custatà quantu l’accasciamentu di e terre è di e fureste, dinù a penurìa di cibu è di sumente pudìa scatinà a cumpetizione trà e scìmie… dapoi sempre mi sentu ind’è mè ind’è a natura… durante decine d’anni aghju seguitatu i scimpanzé abituati à a presenza umana, l’animali èranu in fiduccia… a mo presenza li era indiferente… ma cum’è noi s’addattèghjanu per truvà altri nutrimenti s’elli ùn ne anu più. È, cum’è l’omi, sò onnivori, pronti à difende u so territoriu… capìscenu a nuzione d’agressione » dice Ronan Donovan. In u paese di Hyamajaka, i scimpanzé èranu in cumpetizione diretta cù l’omi. « E fureste primarie ch’èranu i so lochi sò state smachjate per l’agricultura. Dèvenu dunque nutrìscesi di e culture spluttate da l’omi. A sera s’avvicìnanu di l’abitazioni » spieca u fottografu « ma l’incursioni ùn si piàntanu quì », è di cuntà ciò ch’ellu hè accadutu à a famiglia Semata, terrurizata da i scimpanzé chì s’avvicinàvanu tutte e sere, spiènduli. U babbu agricultora, a so moglie è i so quattru cinnini stàvanu quì di più in più inchieti. U 20 di lugliu 2014, un scimpanzé tamantonu surgitu d’un colpu hà chjappu u più ghjòvanu di i zitelli chì si ghjucava in giardinu, purtèndulu cù ellu. I paisani anu pruvatu à richjappalu ma a salma sviscerata di u zitellu di dui anni hè stata ritruvata abandunata. S’hè mortu di e so ferite. L’attacche sò state di più in più numarose è a famiglia si ne andata. In 2017, Ronan Donovan era ghjuntu à piglià fottò di stu fenòmenu di e scimie infuriate. S’hè piattu ind’è a casa abandunata di i Semata, è hà vistu tandu quantu l’attitùdine di e scìmie pudìa cambià d’un colpu minacciendu è inzerghèndusi. In Ìndia in 2020, e scìmie si sò attaccate dinù à Shimla, una cità di 200.000 abitanti. I maccacchi sò fallati da a muntagna per circà à manghjà, arrubbendu i sacchi à a ghjente, murzichènduli, certe volte ancu di più minnacciosi. « A ghjente anu a paura assai è ùn sanu cumu fà » spieca un anzianu ghjùdice ellu stessu murzicatu prufundamente à una gamba allora ch’ellu era nant’à a so terrazza. E scìmie èntrenu ancu in casa per arrubassi à manghjà è viutà i rifrigiratori, si strùghjenu e culture ind’è l’orti.
L’animali si vòltanu contr’à a sorte ingrata chì li hè fatta. Un ritornu di manivella… •