Hè u nome d’un associu di benevulenti è di i so battelli chì fràncanu i mari da u primu di ghjennaghju à u 31 di dicembre di l’annata, dapoi avà quasi 10 anni. Creatu in u 2015 da citatini, sempliciamente umani ch’ùn pudìanu più suppurtà di vede more a ghjente in Mediterràniu, disprezzati è abbandunati à a so sorte. U scopu di SOS Mediterràniu hè di porghje sustegnu è di trattà cù dignità, senza discriminazione, ogni persona in perìculu, in u rispettu di u drittu marìttimu internaziunale. Un associu umanitariu indipendente, fundatu pè u rispettu di l’omu è di a so dignità, qualesìa a so naziunalità è a so urìgine, suciale, religiosa, pulìtica o ètnica. « Salvà, prutege, testimugnà » eccu e missioni ch’ellu s’hè datu SOS Mediterràniu. Succorre a ghjente in perìculu. Prutege ste personi sin’à ch’elle scàlinu in un locu sicuru. Aspettendu, curali, stalli à sente, pòrghjeli amore è aiutu. Testimugnà infine di sta crisa umanitaria insuppurtèvule in Mediterràniu è dà a parulla à sta corcia ghjente.
Ogni annu, sò millaie chì mòrenu cusì, pruvendu à francà u Mediterràniu per fughje e viulenze di u so paese, in Libbìa o in altrò. Imbàrcanu nant’à battelli di sfurtuna, pronti à piglià tutti i rìsichi. « Preferìa à more in mare piuttostu chè di stà un ghjornu di più in Libbìa » conta Wilfried, un aiutatu. « In Libbìa sò statu vendutu duie volte » dice un antru, chjamatu Samy. « Vogliu campà per studià è salvà ghjente » dice torna Esther…
SOS Mediterràniu esiste in Francia, Allemagna, Italia, Svizzera. S’hè cumpratu dui battelli per andà à u succorsu di i disgraziati : l’Ocean Viking è l’Aquarius. Ma pàtenu tutti i tràmpali è e difficultà ghjurìdiche è pulìtiche chì troppu spessu li sò chjosi i porti. Suvente sò messi in detenzione amministrativa i battelli. Di ghjennaghju, l’Ocean Viking hè statu ritenutu 20 ghjorni in u portu di Bari. In 2023, ci sò state 16 detenzioni amministrative, blucchendu i battelli 320 ghjorni à u tutale. L’Ocean Viking hà puru succorsu 71 personi u 2 di ferraghju à u largu di a Libbìa. Hè statu autorizatu à sbarcale in u portu di Livourne à più di 1100 chilòmetri di u locu di u salvamente. Sti porti alluntanati chì li sò imposti vàlenu un annata di navigazione è ste decisioni pèsanu quasi dui anni d’operazioni perse, induve i battelli sò mantenuti luntani da i lochi di perìculu, è impediti di salvà vite…
SOS Mediterràniu dinunzia sta negazione d’umanità, ma ferma più chè mai mubilizatu per salvà a ghjente è òffreli à bordu un pocu di st’umanità chì li hè ricusata. « Dopu à tutti i ghjorni di suffrenze ch’elli anu campatu, sti ghjorni à bordu raprisèntanu un veru ritornu à a vita » spieca SOS Mediterràniu. Hè tutta una logìstica da mette in ballu, in un spaziu strettu cù mezi limitati, ma « cù i gesti di u cutidianu, a squadra di SOS Mediterràniu face tuttu ciò ch’hè pussìbule per guarantisce un accolta degna à ste personi in u bisognu ». Un bagnu, lavassi i denti, vèstesi d’una maglietta pulita, tagliassi i capelli, ghjucà cù elli, o stà à sente a so stòria… hè un prò tamantu per elli.
« Esse testimogni di a trasfurmazione prugressiva di sta ghjente spaventata è traumatizata, u sguardu persu, sin’à ch’elle divèntinu personi carche di vita, hè strasurdinariu » dice torna SOS Mediterràniu. Un associu chì face un travagliu magnìficu è merita u nostru sustegnu ! •
Fabiana Giovannini.