Xylella Fastidiosa, sinònimu di spaventu è destruzzione, si ne parla assai… serà una psicosa o verità ?, si dumàndanu certi. U fattu ghjè chì si ne mòrenu àrburi è arburelli in u Mediterràniu… ma ancu ind’è l’ìsula ! In Italia, in e Pouilles, face un scempiu dapoi u 2013. Una bella regione d’alivi centunarii, più forte pruduzzione d’oliu d’alivu in u mondu… A spècia detta Multiplex di a Xylella Fastidiosa hè stata truvata in Corsica dui anni fà. Ancu assai pare ch’ella ùn hè a sorte truvata in Italia (Pauca) è dunque ùn sarebbe dannosa per l’alivi corsi. Puru sò 200 vegetali chì ponu esse strutti da Xylella Fastidiosa, 27 spècie di vegelati in Corsica cum’è a mòrtula, l’amànduli, i sùari, a murza… sò minacciate è u penseru hè tamantu di vede a specia corsa trasfurmassi è attaccà anch’ella e nostre pruduzzioni cum’è l’alivi, a vigna, l’agrumi…
L’oleicultori taliani sò adduluriti di vede taglià, brusgià s’àrburi maestosi ch’anu nutritu generazioni di i soi. In Corsica, l’oleicultori s’inchiètanu è si vòltanu contr’à u Statu incapace di mette l’ìsula à l’agrottu d’una cuntaminazione.
E spurtazione d’alivi è d’àrburi da tutte e mamme, frà i quali quelli putenzialmente vettori di a malatìa, si cuntinuèghjanu.
Oghjeghjornu, èntrenu sempre in Corsica vegetali d’Italia o di Spagna. Pàrenu fole ! I Baleari sò tocchi dapoi u 2016, è forse ancu di più, un casu hè statu truvatu in Majorque pò un antru in Ibiza è l’alivi dapoi si ne mòrenu.
A Spagna dinù ùn pò francàssila… Si dice ch’un casu di Pauca hè stata truvata in Corsica nant’à un sùaru… Nimu ùn ne parla, fora di Femu a Corsica ! Da prutege una manata di pepinieristi (ch’ellu ci vole di sicuru indemnizà), omu fà a scelta di chjode l’ochji nant’à i rìsichi tremendi chì minàccianu e machje è e pruduzzioni corse. Puru, ci sò e suluzioni. Dapoi ch’ella hè cunnisciuta ssa calamità, l’oleicultori corsi prudùcenu sè stessi i so pedi d’alivi. Quasi 10.000 pianti sò cusì stati prudutti per pudè esse piantati in Corsica. Aspettendu di pudè fabricane di più, anu avutu a cuscenza i nostri oleicultori d’ùn piantà più àrburi da fora ! Un arrestatu prefetturale impedisce a spurtazione di vegetali, ma i cuntrolli sò pochi è micca, è chjòdenu ancu l’ochji i servizii di pulizza tracarchi da u travagliu da fà. È pèsanu i lobby… à rombu di derugazioni, èntrenu pianti da tutte e mamme… Si vede cù ss’esempii sanitarii (si pò parlà di a frebba cattarala dinù), chì a Francia hè incapace di difende a Corsica cum’ellu si deve. Sò rispunsabilità chì dèvenu scade à l’autorità corse. Hè dinù què l’autunumìa !
Fabiana Giovannini.