Sti 22 è 23 di ghjugnu in Parigi, ci hà da esse un appuntamentu internaziunale maiò nant’à l’inghjochi finanziarii per salvà u clima. S’aspèttanu dirigenti di u mondu sanu. L’associi di a difesa di l’ambiente aduniti dumàndanu d’impegnà i grandi gruppi petrulieri uccidentali. TotalEnergies, ExxonMobil, Chevron, BP et Shell anu fattu quasi 200 milliardi di dòllari di benefizii in 2022 ! In u frà tempu, e pupulazioni e più pòvere di u sud pàtenu e cunsequenze di u riscaldimentu climàticu : inundazioni à u Pachistanu è in Àfrica di u sud, sicchine tremende in ìndia, incendii maiò, catastrofe da tutte e mamme… L’imprese di u petroliu, u gaz, u carbonu cundànnanu a pianetta è cù ella l’Umanità… Ùn sarebbe ora di dumandali di mette manu in stacca per riparà i danni fatti ? S’arrichìscenu cum’è mai tutte st’imprese, è cuntinuèghjanu puru à esse prutette da e putenze mundiale. L’ùltimu raportu di u GIEC, l’esperti mundiali nant’à l’evuluzione di u clima, hè statu più chè chjaru nant’à l’urgenza di piantà senza aspettà i prugetti di spluttazione di petroliu, di gaz o di carbonu s’omu vole firmà sottu à l’aumentu di 1,5°C di a timperatura mundiale. Dapoi l’annate 70, l’imprese di l’energìe fussile anu nigatu tutte e cunsequenze chè no custatemu oghje nant’à l’ambiente è nant’à a salute di a ghjente. Puru ùn ci hè tantu bisognu di l’esperti mundiali, oghje ssi disguasti si vèdenu è si capìscenu da tutti. Ancu l’ingeniori di ss’imprese palèsanu listessi custati : i danni sò è saranu di più in più tremendi. Basta à fighjà ciò ch’ellu accade in u mondu sanu di disguasti nant’à u clima, l’aumentu di u livellu di i mari, a strughjitura di i ghjacciaghji, a sparizione di mondu biodiversità, u spiazzamentu di e pupulazioni, e destruzzioni di strade, di case, d’infrastrutture, eccèttera. L’ùltimi 20 anni, i 55 paesi i più sposti à i ciambuttamenti climàtichi còntanu 500 milliardi di dòllari di pèrdita. In u stessu tempu, u prufittu di l’imprese rispunsèvule di sti ciambuttamenti hè 60 volta di più impurtante, allora ch’elle anu tuccatu dinù 500 milliardi di dòllari d’aiutu ogni annu da i guverni di u G20 ! U mondu viaghja à capu in ghjò ! Ssi danni sò stati stimati dapoi u 1988 in funzione di l’emissioni di carboni di e 21 imprese e più pulluante. È ùn hè chè una stimazione bassa, postu chì parechji danni ùn si ponu misurà veradimente, cum’è quelli di a morte di a ghjente, o a sparizioni di spèzie animale o vegetale.
In 2022, à a COP 27 in Charm el-Cheikh, hè statu decisu di creà un fondu per riparà i disguasti di u clima è aiutà i paesi i più pòveri à dà di pettu à tutte e so spese. Era un annunziu stòricu… ancu sè ùn s’era dettu nè quantu, nè cumu, ssu fondu pudìa esse messe in ballu. Per l’associi di a difesa di u clima, un impòsitu nant’à i benefizii di a splutazione di l’energìe fussile sarebbe u mezu u più sicuru per custituisce stu fondu. È sarebbe tandu a manera dinù d’agisce nant’à e càuse, micca solu e cunsequenze.
Action Non-Violente COP21 (ANV-COP21), Alternatiba, CARE France, CARE International, Climate Action Network International, Greenpeace France, Greenpeace International, Oxfam France, Oxfam International, Réseau Action Climat France, Terre des Hommes France, 350.org anu lanciatu pocu fà una petizione ch’hà riguaratu già più di 30.000 ziffre. Voi dinù ziffrate ! •