Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
12 di marzu 1588, Giulio Giustiniani, Vescu d’Aiacciu, sbarca in Bastia. Compie a catetrala d’Aiacciu, fendu vene da Gènova u màrmuru di i purtali à trè ripresa. I primi si sò persi in mare dopu à una timpesta, spieca Carlu Castellani. A seconda volta, sò stati arrubati da i barbareschi. Hè ciò ch’hà dettu u capitanu di u battellu. U Vescu decide di rifà una cummanda ma di pacà solu una volta arricata. Hè stata a bona ! U Vescu hè mortu in Livurna in u 1616 è a so salma hè vultata in Corsica in 1620 per esse seppellita in a Catetrala d’Aiacciu.
12 di marzu sempre, ma di u 1736, u futuru Rè Teodoru sbarca in Aleria, accoltu da Ghjacintu Paoli, babbu di Pasquale.
12 di marzu di u 1914, si pone a prima petra di a ghjesgia Notre-Dame de Lourdes in Bastia. Fù inaugurata u 4 di dicembre 1916.
14 di marzu di u 1770, u Papa Clemente XIV hè in zerga contr’à a Francia… Spieca Carlu Castellani chì dapoi u 754, Pépin le Bref avìa datu l’ìsula à u Papa Etienne II. Clemente XIV manda dunque una prutesta sulenna, ramentendu ch’ellu ùn vole « sminuisce i dritti timpurali di u Santu Sede nant’à l’ìsula. A nostra vuluntà chjara è furmale hè di mantèneli cum’elli sò sani sani. Ùn hè ghjusta chì a Sede apustòlica àppii u mìnimu guai in e prerugative eclesiàstiche chì sò e soie in Corsica dapoi tempi immemuriali… Prighemu a Francia, s’ella hè mediatrice in u règulamente di a Repùblica è a Nazione corsa, di cunservà intatti i dritti di u Santu Sede nant’à a Corsica, “perch’è l’alto dominio sopra quest’Isola appartiene al Romano Pontifice”».
U Rè di Francia ottene quantunque u drittu di numinà i veschi.
Amenta torna Carlu Castellani, chì Munsignore Pietro Spinola, vescu d’Aiacciu (1698-1715) avìa sta formula : « Ti battezu in nome di Roma, Toma è del Papa ». In Corsica, a parulla Toma hè firmata in a spressione : Roma è Toma. Secondu à Fernandu Ettori (Antulugìa di e spressioni corse, 1984) assuciava dui cuntrarii : a grandezza cù Roma è a cadutta cù Toma.
18 di marzu, hè a Madunuccia, A Madonna di a Misericòrdia, patrona di a cità d’Aiacciu. •
