Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
5 di marzu di u 1817, Luigi XIII manda in Corsica un cummissariu speciale, Constant, incaricatu d’infurmalu nant’à l’evoluzione pulìtica di l’ìsula. Dice : « I Corsi sò troppu barbari per apprezià ciò ch’ellu face per elli u migliore di i rè »… è ordonna « lege speciale è severe »…
6 di marzu 1870, Georges Clemenceau à a Càmera di i deputati in Parigi, pone una muzione per dumandà chì : « a Corsica smetti sùbitu è di manera irrivucàbile di fà parte di a Repùblica francese »…
9 di marzu 1883, Francescu Morelli fonda in Bucugnà a Cumpagnia isulana di navigazione. Per via d’una gattiva gestione è di a calata di e suvvenzioni decisa da u guvernu, u tribunale di cumerciu di Marseglia a dichjara in bancarotta u 17 d’aprile 1891.
Francescu Morelli (1833-1892), cunsigliere generale di Bucugnà, bunapartista, pò republicanu, diventa presidente di a Cumagnia di navigazione Valery, dopu à a morte di Valery in 1879. Compra una parte di i battelli è fonda a Cumpagnia isulana di navigazione in 1883.
10 di marzu 1776, un editu reale impedisce l’intarri ind’è l’arca. Era un tufone in pede à l’altare di e ghjesgie induv’omu intarrava i morti. Quandu l’arca era piena, si viutava è l’osse èranu seppelliti à l’entrata principale di a ghjesgia, in u locu chjamatu u sacraziu.
Pruverbiu : Puzza cum’è un arca.
10 di marzu 1858, un decretu permette a spluttazione di a mina d’antimoniu di Mèria. In 1890, a mina hè à a cima di a so spluttazione, caccia 1000 tunnellate annuale è impieca 300 parsoni.
12 di marzu, hè San Ghjustina, morta in u 1319 è San Mamilianu, esiliatu in Àfrica à u Vèsimu sèculu. Era festighjatu in u Murianincu cù grandi fochi, à tempu ch’elli èranu incesi dinù nant’à l’ìsula di Montecristu, chjamata Monte Giove. San Mamilianu li avrebbe datu ssu nome sbatizzèndula. A legenda conta ch’una notte pescadori bastiacci èranu presi in a timpesta. Àncure perse, vele strappate, maghji sciappati, èranu per affundassi quandu un marinaiu d’una decina d’anni s’hè messu à pricà, dumandandu salvezza, ch’avia già persu u babbu è ch’ùn vulia lascià a so mamma sola. Diu sorge allora di a sciuma nant’à una collina. U mare tandu si calmò, i piscadori rientronu salvi in u portu. U lindumane, anu vistu chì a collina ci era sempre è a chjamonu Montecristu. •
