3.020 morti, frà i quali 292 donne è 211 zitelli dapoi u 2 di marzu… hè u bilanciu tremendu di a guerra di u Libanu. Un millione di personi sò state spiazzate, ubligate di fughje a so casa, i so lochi…
400 droni ucrainiani sò stati lanciati contr’à Moscù ind’è a nuttata di u 20 di lugliu. Parechje infrastrutture sò state tuccate ancu sè a difesa aeriana rùssia hè ghjunta à intercettanne uni pochi. Un attacca chì face sèguita à parechji missili balistichi rùssii lanciati contr’à Kyev fendu cinque morti è una trentina di feriti.
Ùn vole finisce sta guerra…
40.000 èttari brusgiati dapoi u principiu di l’annata in Francia. Hè digià francatu u bilanciu di 2025, allora chì a stagione principia.. Ci sò stati 111 interpellazioni hà dettu u ministru di l’interiore, Laurent Nuñez. Nove fochi nant’à deci sò di a manu di l’omu. Quattru personi sò state arrestate per via di u focu di Fontainebleau…
Arritti vi ingagia à leghje è à fà leghje u so cartulare cù l’espertu in focu di fureste, Ghjuvan’Luigi Rossi, chì spiega e càuse è l’inghjochi à vene di i fochi d’intensità maiò.
• Leghje dinù : « La Corse doit devenir un territoire plus résilient face au feu »
Centinaie d’èttari brusgiati sta settimana in Corsica. Corti, Albertacce, A Restònica… gattive cundizioni meteò, ma dinù mezi ch’ùn bastàvanu micca per dà di pettu à st’incèndii ch’ùn pudìanu esse tuccati chè per via di mezi aèrei…
4.500 passi è veni nant’à a strada territuriale 20 da francà Vènacu è Vivariu … u passagiu diventa infernu pè i camiò è per l’abitanti. Tutt’ognunu cunnosce è s’hè digià truvatu bluccatu per via di l’incruciamentu di dui camìo rimorca. A Cullettività di Corsica privede già 8 millioni d’àuri da accuncià a strada : 4 millioni per u centru di Vènacu è dui parcheghji di 20 è 16 piazze, è 4 millioni per Vivariu pè a strada di Muracciole attraversandu u paese. U travagliu principierà in 2027. Un antru prugettu di parcheghju di 26 piazze in Vènacu serà aiutatu da a CdC. Ma u prublema maiò ghjè st’incruciamentu di camiò. A bona nutizia hè chì a CdC ci travaglia da chì ssi camiò ùn frànchinu più u centru di u paese, hà dettu u cunsigliere esecutivu in càrica di i trasporti, Ghjuvan’Felice Acquaviva. Sarebbe veramente una bona !
In quantu à Vivariu, u scopu hè d’accuncià a strada è migliurà u passagiu, tuttu priservendu u platanu chì ferma quì dapoi generazioni d’abitanti. Un capatoghju di più pè i servizii di a CdC.
12 maestri maiò internaziunale, frà i quali a campeone di u mondu è u campeone d’Auropa, 121 ghjucatori, 12 naziunalità… ùn s’era mai vista un mondu cusì scemu è una tala rièscita in Quenza per un turneu di scalchi u 5 di lugliu scorsu. I scalchi in Corsica hè qualcosa di tremendu sin’à ind’i paesi i più rinculati ! •
• Di più infurmazioni : https://www.corse-echecs.com
