Hè natu un Cullettivu di Sulidarità cù a Catalogna. L’Auropa ùn pò cuntinivà cusì à sarrà l’ochji è fà nece d’ùn vede a viulazione di u Statu di drittu inni Spagna, cù a scusa ch’ellu s’agisce d’un affare internu à u statu spagnolu. Eccu u manifestu adupratu da u cullettivu.
« Par tutti i pòpuli, a dimucrazìa hè un acquistu tantu priziosu cà incertu è pocu sodu. Igni mumentu hè minacciata, scuzzulata, è u rìsicu di vèdela sparisce hè maiò. A vigilenza di tutti unn hè micca lussu.
Oghje, ciò chì si passa in Catalogna ci inqueta assai.
Ùn sò cà arristazione di rispunsèvuli assuciativi è pulìtichi, viulenze pulizzarie contru à tinti manifistanti degni è pacìfichi, misure riprissive contru à funziunarii, diputati, merri, massmedia, imprese, u piazzamentu sottu tutella di u statu d’una istituzione rigiunale, è a tagliatura di u ritale InterNet è d’altri ritali di cumunicazione : à nome di a difesa è di a risturazione dill’òrdine custituziunale, u statu spagnolu ùn pianta di calcicà u statu di drittu, cù l’appoghju dill’apparatu ghjudiziariu.
I dritti civili è pulìtichi sò i più culpiti : a libertà di parolla è di riunione pacìfica, u drittu à l’infurmazione, u drittu di manifistà libaramente è pacificamente.
Rifusemu ssa diriva riprissiva Sullicitemu u ricorsu dill’Unione Aurupea. L’Auropa ùn pò cuntinivà cusì à sarrà l’ochji è fà nece d’ùn vede a viulazione di u Statu di drittu inni Spagna, cù a scusa ch’ellu s’agisce d’un affare internu à u statu spagnolu. Ssa manera di fà cussistarìa à rinunciià à i dritti è e libertà fundamintali, varantiti è prutetti da a Cunvinzione Aurupea di i Dritti dill’Omu, da a Dichjarazione Universale di i Dritti dill’Omu è dall’artìculi 2 è 6 di u Trattatu di Lisbõa, chì custituisce a lege fundamintale dill’Unione Aurupea.
Ci sò i ghjùdici, in Auropa, chì rifùsanu ssa riprissione pulìtica.
Ùn applìcanu micca u mandatu d’arrestu aurupeu. S’oppònenu à l’estradizione di capi catalani parsiguiti da Madrid, è chì sò fughjiti in lu so paese.
Più di quessa, igni locu, in Francia è inn Auropa si vede nasce cumitati di sulidarità cù a Catalogna. Intarpèllanu i guverni di i stati dill’Auropa. Spàrghjenu e infurmazione, à chì l’upinione pùblica sìa mubilizata.
Ramèntanu chì u dibàttitu sopr’à u tema dill’indipindenza hè affare di Catalani, a so primmura à elli, hè a dimucrazìa.
U cumitatu chì no emu fundatu in Còrsica piglia listessa andatura, ricunnisciuta cum’è issendu soia.
Par tutti i pòpuli, a dimucrazìa hè una cunquista priziosa, ma hè roba dillicata Inni Spagna, avìa finitu par piglià ràdica quand’ellu morse in lu so lettu un certu dittatore. Ma in fatti, malgratu una struttura stàtica à pocu pressu dimucràtica, a Spagna hà sempre di i vai à sbarrazzassi di i turmenti di u so pas satu fanchistu. Par un dettu, ùn sò ancu à ritruvà i resti di 130 000 parsone sparite in lu mentre di a verra civile, è e tinte famiglie ne sò sempre à riclamà ghjustizia.
Hè più cà chjaru chì unu rigime chì manda prigiò i so avvirsarii pulìtichi, ùn pò pratende à difende e libertà pùbliche è à camminà à nantu à a strada di a dimucrazìa. Ciò chì si passa avà in Catalogna ci dummanda à tutti d’apre l’ochji è d’esse vigilante.
L’Unione Aurupea ùn pò più cuntinivà à fà a ceca è rèndesi culpèvule di cumplicità cù ssa rigrissione dimucràtica ch’arruvina unu di i so stati membri.
Cunvinti chì no semu ch(ella tocca à noi tutti, omi è donne, membri dill(umanità, di ramintà chì a dimucrazìa è i Dritti dill’Omu sò i fundamenti custitutivi di u prugettu aurupeu, noi, i signatarii, dichjaremu a nostra sulidarità cù a Catalogna.
Unn accittemu micca chì Madrid si sbarrazzi di i so avvirsarii lampendu in pianu u prucessu dimucràticu.
Dummandemu à ch’elle sìanu rimesse in libertà, sùbitu è senza altru, e parsone incarciarate. Dummandemu à ch’elle sìanu annullite e prucidure d’azzione ghjudiziarie ingagiate, par tutti i dirigenti catalani cuncirnati.
Dummandemu à chì u risultatu dill’alizzione in Catalogna u 21 dicembre 2017 sìa rispittatu, è ch’ellu sìa messu in piazza un guvernu autònumu in cunfurmità cù i risultati sciuti da a magiurità dill’urne.
Dummandemu à ch’elle sìanu rimesse in funzione tutte e varantìe dimucràtiche chì custituìscenu i fundamenti di u Statu di Drittu, di manera à ch’ellu sìa urganizatu unu referendum chì parmetti à Catalani di dicide dill’avvene di a Catalogna. »
ssolidaritacatalunya@gmail.com