Lisandru De Zerbi hè aghjuntu à a lingua corsa à a merrìa di Bastia. Ma, cum’ellu a dice ellu stessu, hè dinù un insignante è un militente assuciativu. À sfarenti livelli cunnosce dunque u so sughjettu. Cù Ghjiseppu Turchini è uni pochi d’altri militenti di a lingua anu creatu l’associu Praticalingua, « centru d’amparera è di pratica di u corsu in immersione. » Si parla – è si campa – u corsu in sfarenti attelli. Ghjè dì quant’ellu hè cunvintu di a filusufìa di l’immersione linguìstica. Ci conta quì a pulìtica ch’ellu prova à mette in ballu à a merrìa di Bastia. Frà l’azzioni inditate, ci hè u sustegnu à l’associu Scola Corsa di Bastia. « U risultatu hè chì sò i zitelli chì ci vincenu ! A forza assuciativa quand’ella vene appughjata da l’istituzione è chì ognunu batte listessu chjassu fiancu à fiancu, diventa una putenza chì face vince » dice Lisandru De Zerbi. Chì bella scumessa !
Sì elettu rispunsèvule di a lingua à a merrìa di Bastia, à chì ne simu dopu à un pocu più d’un annu di messa à u travagliu ?
Avemu elaburatu strategia è metudu da tuccà u nostru ogettivu : fà chì un’ecunumia di a lingua sia pussibule in Bastia à cortu, mezu è longu andà. Sta strategia hè puntellata nant’à trè tappe : nurmalizà, prufessiunalizà, integrà.
In cosa cuncerna a nurmalizazione di l’usu di a lingua, furmemu l’animadori di i centri di sciali, e cantinare, l’ATSEM, i, persunali di a ciucciaghja, da avvialli tutti quanti versu l’immersione. Cuntinuemu dinù u travagliu di denuminazione di i carrughji è di e stazione è linee di i trasporti publichi, in partenariatu cù a CAB. Caccemu lessichi tematichi, per i sculari è per l’adulti, spessu fruttu di un travagliu d’elaburazione da mudernizà è faciulità l’adopru di u corsu.
Per cosa riguarda a nostra vuluntà di prufessiunalizà a cumpetenza lingua corsa, hè statu dipostu u permessu di a futura Casa di e Lingue, dopu elaburatu u so cuntenutu cun l’attori publichi è privati di a cità, è chì serà inaugurata quist’annu chì vene. Hè un prugettu assai ambiziosu. Ci seranu servizii di furmazione, di traduzzione, d’aiutu à l’ingienieria di prugetti, sale mutualizate per l’associ, da centralizà, cuurdinà è dunque accresce in quantità è qualità a pruduzzione in lingua corsa. Travaglieremu in sta casa à dà fondu è forma à un dispusitivu chì ci cridimu assai è chì cuncerna a nostra strategia d’integrazione di u corsu in u prugettu di sucietà glubale : l’Osteria Spartuta.
Quandu hè prevista ?
Hè previstu per a fine di mandatura è deve permette un’alternativa innuvante à u turisimu di massa, chì permette di sparghje e ricadute ecunomiche trà i cummercianti, persone risolze è servizii di prussimità. Hè una nova forma di turisimu, patrimuniale è linguisticu, rispettosu di u locu è di a ghjente.
Infine, ci appruntemu à prupone à u gran publicu, allocc’à a fine di l’annata, un’applicazione per smartphones cù un dizziunariu cumpiitu, un cunghjucadore, una cartugrafia di Bastia cù i toponimi originali. St’applicazione serà chjamata à evuluà è ci ritruveremu i parcorsi tematichi di scuperta di l’Osteria spartuta, i servizii culturali, intellettuali è cummericali cursofuni per una scuperta o una visita di Bastia 100 % in corsu.
Eppo bella sigura, accumpagnemu à Scola Corsa !
Ghjust’à puntu, ci hà da esse un evenimentu di sittembre, hà da apre a « Scola Corsa di Bastia », tuttu hè in piazza ?
Iè, nant’à u pianu materiale, a Scola Corsa serà impiantata in senu à u gruppu sculare Georges Charpak, in Toga. L’associu chì capitaneghja sta scola si dà assai di rimenu da fà chì di settembre, ùn manchessi nunda. Hè un travaglione chì dumanda un partenariatu d’ogni ghjornu è chì riguarda prublematiche ghjuridiche, finanziarie è pedagogiche acute. Ma avemu avanzatu bè tutti inseme.
Rispondenu i parenti ? Quantu scrizzioni avete per sta prima annata ?
Iè, i parenti sò assai interessati… è curagiosi dinù perchè hè una decisione impurtante. Ma anu capitu bè l’inghjochi ligati à stu modu d’insignamentu è sta manera nova di « campà » a scularità di è per i zitelli, cù un impegnu impurtante dumandatuli. Tutti sò assai intusiasti perchè rassigurati nant’à a determinazione è a capacità di travagliu di l’associu.
Eri di u primu viaghju in Paese Bascu per scuntrà i nostri amichi di l’ikastolas, chì n’hai pensatu ?
Sò partutu à tempu cum’è elettu, ma dinù cum’è militante assuciativu è insignante. Hè stata propiu una stonda incridibule. Cosa mi hà marcatu u più hè chì ind’è ste scole, sti cullegi è licei, ci s’incontra una cumunità assai viva, dinamica, unita. Insignanti è sculari sò felici d’esse inseme. Campanu u so bislinguisimu sereni. I Baschi attaccanu forse menu impurtanza chè noi altri Corsi à u fattu puliticu schjettu ma a so fede militante è u so estru custruttivu li arreca risultati propiu magnifichi. Si battenu per e so scole assuciative è altrettantu per e filiere di u settore publicu. U risultatu hè chì sò i zitelli chì ci vincenu ! A forza assuciativa quand’ella vene appughjata da l’istituzione è chì ognunu batte listessu chjassu fiancu à fiancu, diventa una putenza chì face vince.
A nostra lingua hè in bona salute ?
À l’ora chè no parlemu, benchì ci fussi da ralegrassi chì u statutu suciale di a lingua appia pusitivamente mutatu in Corsica, ùn simu ancu salvi. A ragione hè chì fermanu troppu paure ingiru à a lingua : paura ch’ella smarrisca, ch’ella fussi parlata male, ch’ella si mudernizessi è perdessi di stu modu u so estru di tandu, ch’ella discriminessi dinù. Ste paure palesanu u fattu chì, per avà, benchì siguri cullettivamente chè no a vulemu tene, ùn simu micca abbastanza persuasi di u so interessu reale. Ghjè un custattu dulurosu ma chì ci vole chè no fessimu.
Da arricà suluzione à stu custattu quì, ci vole à presentà chjaramente l’inghjochi. Cunniscimu bè u diannosticu, cunniscimu dinù i rimedii. Avemu l’ogettivi, e strategie, u metudu. Ùn ci vole più à parlà di a lingua cum’è un ogettu staccatu da l’altri campi sucietali, nè menu à intestacci à vulella « salvà » senza sapè troppu perchè in u cuncretu. Innò, parlemu d’ecunumia, di cummerciu, di leia suciale, d’eculugia è di raportu à u locu, d’assestu di u territoriu dunque dinù, d’internaziunale. In tutti sti duminii quì, u corsu, non solu ci hà a so piazza, ma anzi, hè un furmidevule arnese di sviluppu ! Ùn ci ne privemu più. •