Insignante di lingua è cultura corsa, fundatore di l’associu Praticalingua, elettu à a merìa di Bastia dapoi u 2020, aghjuntu à a lingua corsa è à a ghjuventù, Lisandru de Zerbi ùn si face troppu sente, ma travaglia è, cum’ellu a rivendicheghja, sà induv’ellu vole andà ! Cunnosce bè a situazione di a lingua corsa, i passi fatti, i passi da fà, l’arnese da custruisce. A vuluntà hè di ghjunghje à un veru riacquistu di tutta a sucietà corsa, impegnandu tutti l’attori. I primi mesi di mandatu, hà scontru à tutti, cunfraterne, animatori in i mèdia, attori assuciativi, gruppi culturali, attori ecunòmichi, sindicati di l’educazioni, pulitichi è gruppi di travagliu da tutte e mamme, impiecati à a merìa, persone cunnisciute cum’è memoria di a cità… U scopu ? Fà cunnosce à tutti a strategìa ricercata, quella d’integrà u corsu in un prugettu di sucietà glubale. Une poche di rialisazioni sò state fatte in trè anni. Hè diffìciule di parlanne tamantu hè statu u travagliu fattu. Eccu quì cù ellu, un riassuntu di l’òpere lanciate à prò di a nostra lingua, è spessu l’indiature prese da ch’ella si spanni in u cutidianu di a cità. Lisandru De Zerbi hè dinù impegnatu ind’è l’elaburazione di a pulìtica linguìstica di a Cullettività di Corsica. Infine chì, si sumineghja oghje. Bramemu di pudè racoglie in fùria i frutti di tutti sti sforzi !
Eccu trè anni chè vo site in càrica di a lingua à a merìa di Bastia, cuntàteci a pena l’indiature chè v’avete presu ?
Prima, avemu multiplicatu per trè l’agenti di u serviziu da esse più efficaci è operaziunali. A nostra strategia s’arremba nant’à trè puntelli : a nurmalizazione, chì cunsiste à accresce a visibilità di u Corsu in u spaziu pùblicu è cuntinuà à fà di Bastia una cità Corsa, a prufessiunalizazione, da creà un’ecunumìa di a lingua è infine a sparghjera, da integrà u Corsu à l’inseme di u prugettu di sucietà è fà ch’ellu fussi indispensèvule à u sviluppu ecunòmicu, l’azzione suciale, u pusiziunamentu à l’internaziunale.
Qualesse sò e rialisazioni ? I prugressi ch’omu misura ?
Oghje, a lingua Corsa hè incunturnèvule in Bastia. Aviamu cuminciatu per annunzià a nostra strategìa è u nostru fògliu di strada. Per quessa emu incuntratu una centinaia d’attori diversi è varii è sottumèssuli a nostra visione ch’elli ci pòssanu piglià parte. Per quessa ci vulìa à ecchipacci è hè stata fatta cù a Casa di e Lingue induv’è sò stati investiti più di 650.000 €. Hè u più grossu investimentu fattu pè a nostra lingua dopu à l’Università, testimunieghja di l’ambizione pè u Corsu di a Cità di Bastia è di a Cullettività di Corsica chì hè parte di stu prugettu.
Circhemu à intervene in u serviziu pùblicu cù a furmazione di tutti l’agenti perisculari è emu dinù participatu à lancià à Scola Corsa da cumplettà l’offerta à destinazione di i zitelli. Avemu dinù stallatu l’Accademia di Bastia, cumposta di spezialisti è passiunati di Bastia. Hè un organu chì a so sapienza è a so auturità ci arreca legitimità, pertinenza è saviezza.
Simu dinù ligati cù u Sporting Club di Bastia per un partenariatu chì darà à a lingua una visibilità tremenda è ci permetterà d’accrèscene a so presenza in Furiani.
Infine, cù a Cumunità d’Agglumerazione, avemu turnatu à dà u so toponimu originale à tutti l’arresti di bus di l’agglumerazione. A tupunimia ramenta a nostra Storia, dice u presente è prepara l’avvene chì ghjè una chjave di lettura maestra di u nostru locu, un arnese maiò d’arradichera.
A Casa di e Lingue, eccu una bella iniziativa ! Cosa hà da porghje di novu pè a cità ? pè a lingua ?
A Casa di e Lingue hè un arnese ineditu in Corsica è in Europa è ne simu assai fieri, hà una vucazione naziunale è internaziunale chì in fin d’annata ci serà stallata a Scola Internaziunale di e Lingue chì prupunerà l’amparera è a pràtica simultanea di lingue strangere grazia à a lingua Corsa. U tempu d’amparà una lingua sola hè passatu segondu noi, ci tocca à esse antivisti è ghjè ora avà d’amparanne parechje attempu chì quì, u Corsu hà un rollu maestru da ghjucà. Simu piunieri in stu duminiu quì !
A nostra lingua hè forte sè no vulemu bè integralla pienamente in a so aghja di predilezzione in core à e lingue rumàniche.
In sta Casa di e Lingue, operèghjanu à u cutidianu u serviziu LCC di a Cità, a Fundazione di u Patrimoniu, u retale Canopé è Praticalingua. Simu dunque armati da pudè suddisfà ogni bisognu, ch’ellu riguardi a furmazione, a pràtica, u sustegnu à l’Educazione, a traduzzione è l’innuvazione in tanti duminii cum’è u multimedia per esempiu. A Casa di e Lingue hè infine una centrale chì permette di mutualizà e risolze, cumprese umane, è un mutore di l’animazione in Corsu cun ogni vènnari una stonda d’incontru cun artisti o spezialisti di tanti duminii. Ci sò spazii mutualizati per fà chì i lochi di cunferenze, di raprisentazione, di ripetizione è d’addunite ingiru à u Corsu sìanu di più accessìbuli.
Chì sò i scopi di sti scambii cù altre regioni aurupee ?
U scopu di a nostra strategia di dà à u Corsu una purtata à l’internaziunale cunsiste à barattà e nostre sperienze prima. L’avemu fatta cun l’Università di Bologna chì hè una punta in l’insignamentu di e lingue è di l’intercumprensione trà lingue latine, sò ormai partenarii preziusìssimi perchè capacìssimi è d’auturità di livellu mundiale. N’emu fattu altrettantu in Paese Bascu cù i nostri amichi di Seaska, ciò chì ci hà aiutatu à lancià Scola Corsa, è cù u Bearn, in La Ciutat, travagliemu nant’à l’aspettu multimedia chì sò assai avanzati in stu duminiu. In fine d’annata a Cità di Bastia surterà un’appiegazione cumpiita per smartphones cù un dizziunariu largu, un dizziunariu analògicu è un cunghjucadore. Serà quì torna un ecchippamentu fattivu chì ghjuverà à u più gran numaru. L’appiegazione serverà dinù à accoglie una cartugrafia cumpletta di i toponimi lucali è e strade di scuperta di l’Osteria Spartuta, u nostru prugettu di turìsimu linguìsticu è patrimuniale da creà un ecunumia intelligente grazià à u Corsu.
Uni pochi d’associi ci si tròvanu aggrottu, cum’è Praticalingua, eccu un antra rialisazione bellìssima, cuntàteci a pena u so bilanciu…
Praticalingua hè stata a prima Casa di a Lingua, aperta in 2016 è hà servutu di mudellu à a decina di Case chì nucciulèghjanu oghje a Corsica sana. Hè un arnese chì permette à l’aderenti di passà da a cumpetenza teorica à a cumpetenza pràtica. Sò più di 200 aderenti settimanali spartuti in una trentina d’attelli. Hè una vera cumunità, arradicata à u so locu è aperta nant’à a sucietà. Dipoi sett’anni, emu vistu persone cacciassi u malasgiu à parlà a so lingua, d’altri scòprela è falla soia, d’altri torna diventà furmadori à u so tornu, d’altri infine truvà vie di prufessiunalizazione fèndune u so mistiere chì sò diventati insignanti per esempiu. A verità è a sincerità di u travagliu di terrenu pàssanu è vìncenu.
Ci hè statu una bella serata a settimana scorsa cù tutti l’allevi, sò mumenti impurtanti di spartera per mustrà ciò ch’ella porghje a nostra lingua ?
Avemu addunitu più di 500 persone ingiru à u travagliu di i furmadori è di l’aderenti. Era una stonda sebbiata di spartera, d’amicizia è soprattuttu di speranza. U Corsu hà bisognu di scunghjurà e paure ch’ellu hà pussutu inghjennà : paura ch’ellu smarrisca, paura ch’ellu discriminessi, paura d’ùn esse efficiente è d’ùn serve più. Custì, si palesa l’esattu cuntrariu, ci hè u piacè è u seriu, l’arradichera è l’apertura, a gioia è a speranza.
À livellu di a Cullettività di Corsica, partecipate à a pulìtica messa in ballu ? À chì ne simu ?
Aghju participatu à l’elaburazione di u raportu d’orientazioni presentatu da a Cullettività è chì sbuccherà nant’à un pianu ambiziosu cum’è ùn ci n’hè mai statu. Hè bella capità chì ci ci vole à strappà a cuffizialità, ma hè dinù bella capita chì ùn cuntemu di trimà davanti à nimu perchè pigliendu ghjustu l’esempii di e Case è di Scola Corsa, femu a dimustrazione cuncreta chì pudemu sbuccà. Quandu averemu lanciatu l’Osteria spartuta, averemu non solu portu un’alternativa à u tùrisimu di massa ma averemu creatu dinù un’ecunumia benefica à tutti, riabilitatu u fundiariu è prumossu a cumpetenza lingua corsa in u settore privatu, fèndune a prova ch’ellu hè una più valuta in tèrmini d’attrattività. Per avà sò principii di risposte à a nostra prublemàtica. Dumane seranu arnesi incunturnèvuli.
Puru hè sempre una lingua detta minacciata, cusì dice l’Unesco, si pò salvà a lingua corsa ?
Ci vole à pòneci e bone quistione. Perchè operà à prò di u Corsu ? Perchè st’elementu sottusviluppatu finora hè indispensèvule à a cuncretizazione di un prugettu di sucietà intelligente. Tutti quelli chì a cunsiderèghjanu cum’è un sugettu segundariu màncanu di visione è d’intelligenza in a misura ch’elli scàrtanu un elementu centrale di u nostru locu. Micca ecunumia astuta, micca leia suciale sana, micca esistenza à l’internaziunale senza a lingua.
Sè no pensemu vulè salvà a lingua cum’è parlata da i nostri antenati ci sbagliemu è anzi ùn ghjuverìa micca s’ellu ùn hè à addisperassi perchè hè òpera impussìbule è inefficiente. Sè no vulemu ghjustu sazià un bisognu identitariu schjettu, ci sbagliemu dinù. Sè no cuntinuemu à studià indefinimente u perchè di u cumu spieghendu chì Parigi solu tene u nostru destinu in e so mani, manchemu d’ambizione. Parigi finiscerà per dacci un statutu degnu di stu nome à a nostra lingua perchè l’emu da impone in i fatti cum’è un bisognu vitale. Ma stu bisognu, ci vole à sudà è travaglià senza scaglià per ghjunghje à palisallu.
Vale à dì ? Chì messagiu vulete lampà à prò di ssu scopu essenziale ?
A nostra sfida maestra hè di sceglie bè i nostri partenarii chì u Mondu ci aspetta. A nostra sfida hè di dacci i mezi da fà chì u Corsu sia indispensèvule à u sviluppu ecunòmicu, à a definizione di u Pòpulu Corsu, à a nostra manera d’esse à u Mondu.
Si sèntenu discorsi chì vulerìanu cuntentassi di stabilisce l’essezza Corsa arrimbèndusi nant’à u dirittu di u sangue o figliazione più o menu definite. Sti discorsi sò bell’è boni ma màndanu à caternu a primura linguìstica cum’è puntellu maestru di l’identità Corsa. Pensu eiu più chè mai chì « Lingue face Pòpulu » ciò chì mi pare a definizione più soda, efficiente, sinnuta è realista, tullerante è muderna per fà chì u Pòpulu Corsu cuntinuessi à esse. Cù e Case di a Lingua, cun Scola Corsa, cun l’intervenzione in u serviziu pùblicu, cù un’ambizione cuncreta ecunòmica è internaziunale, vogliu creà è furtificà l’ecchippamenti chì ci abbisògnanu. Sò esattamente induve vogliu andà è ci anderaghju senza scaglià. •
* En savoir plus :