Alinu Gherardi hà a nostra cultura arradicata in core. Membre di u gruppu Missaghju, natu 30 anni fà, hè autore, cumpusitore, interpretu, è direttore di u Spaziu Culturale di Biguglia. I so maschji, Lisandru, 14 anni, è Cesaru, 11 anni, sò dighjà grandetti per entre à a Scola Corsa, ma pàrlanu un corsu schietu ! Pè i parenti di Biguglia, Alinu, cù u so talente, u so dinàmisimu è a so diterminazione, era a più bella scelta per piglià a prima presidenza di a Scola Corsa di Biguglia !
« Simu una squadra cù una vuluntà di a prim’ora diceraghju pè a difesa di a nostra lingua, chì i nostri figlioli, i nostri zitelli, pòssinu parlà corsu. Dunque quand’ellu m’hè stata dumandata di piglià sta presidenza, sò statu assai cuntentu. Vogliu dì chì metteremu, parlendu sott’à l’autorità di u sgiò merre, tutta l’energìa di a cità per fà avanzà u nostru associu è per chì sta scola andessi di manera u più bè pussìbule. Faremu cù e maestre un prugettu pedagògicu inseme, è saremu quì accantu per aiutale, è dalli cù a mùsica è tutte l’azzioni trasculare i mezi di riesce. Cù u Spaziu chì ghjè quì, pudaremu fà vene per un dettu i zitelli, tuttu què in cuncertazione cù e maestre. Sò assai felice di fà parte di sta mossa populare, cuscente di e rispunsabilità chì seranu e nostre, ma dinù di tuttu ciò ch’ellu ci ferma à custruì per pudè sunnià chì dumane a lingua corsa in un mondu mudernu, sia disciolta, lìbera è aduprata da tutti ! » •