A Currilingua hè una corsa à pedi lanciata da u Cullettivu Parlemu Corsu per sparghje a nostra lingua è per arricoglie soldi da finanzà prugetti à prò di a lingua corsa. Ci tocca à scrìveci cù una squadra per corre trasmettèndusi un testimoniu da manu à manu.
A prima currilingua hè stata corsa annu da Borgu à Sulinzara, sìa 90 chilòmetri. Sò parechje e squadre à avè corsu, cumprèndusi un chilòmetru o parechji.
U chilòmetru costa 100 euri. A corsa hà duratu 7 ore da a matina à a sera è hà raccoltu 14.005 euri !
Hè una corsa chì si vole festiva, impignendu u più pussìbule ghjente è si brama di falla cresce ogni annu. Tutti i chilòmetri una persona sfarente piglia u testimoniu. Ùn site micca ubblicatu à corre tutti i chilòmetri, basta à partecipà ! È ùn si corre micca per vince, ci spieca u presidente di Parlemu Corsu, Micheli Leccia, ma per fà vince soldi pè a nostra lingua. E squadre còmpranu i chilòmetri è più ci hè ghjente chì corre, più s’arricoglie soldi, è più si puderà aiutà prugetti à prò di a lingua !
A pròssima Currilingua si ferà u 26 di ghjugnu, trà Aleria è Bonifaziu ! Vale à dì 101 chilòmetri. Si parte à 7 ore di mane da a piazza d’Aleria. Vi pudete scrive avà. In tantu chè intrapresa, associu, scola, gruppu culturale, sindicatu, squadra spurtiva o in tantu chì una manata d’amichi, ciò ch’imprema hè u core ch’omu mette à corre pè a lingua corsa ! Hè un bellu mumentu da sparghje inseme ! Aiò currimu pè a nostra lingua ! •