Lingua

Herri Urrats 2023, a festa di e scole immersive in lingua basca

Herri urrats 2023

Da u 13 à u 16 di maghju, Scola Corsa hà torna urganizatu un viaghju di studiu in Paese bascu, cù l’aiutu di u deputatu aurupeu Francescu Alfonsi. L’associu appronta a so rientrata è spessu l’apertura di u corsu preparatoriu (CP) in i siti di Bastia è Biguglia. Una delegazione dunque di maestre, amministrativi è furmatori era in Baiona per scuntrà l’amichi di Seaska, a federazione ch’urganizeghja l’ikastolas, e scole immersive in lingua basca. Un scambiu per amparà di a so sperienza, è per rinfurzà a dinàmica pròpia à Scola Corsa. Un situ novu aprerà in Corti di sittembre, forse dui, s’ellu ci sò bone nutizie di e discussioni cù u Statu è ch’ellu si ghjunghje à strappà a famosa cuntrattualisazione, di drittu per tutte e scole immersive di Francia.

Dumènica, a delegazione hà avutu u piacè d’esse invitatu à Herri Urrats, a festa di e scole immersive in lingua basca ! Una manifestazione maiò ch’adunisce tutti l’anni sin’à 50.000 personi in giru à u lacu di St-Pée-sur-Nivelle cù animazioni da tutte e mamme, urganizate da i parenti di l’ikastola. Quist’annu era sott’à una piossa tremenda, è malgratu què, decine di millaie di personi torna à sparghje à lingua basca è à testimugnà di a dinàmica di sse scole assuciative immersive ! Arritti ne rivenerà à parlà a settimana chì vene. Aspentendu, eccu qualchì stampe di ss’evenimentone. Gora Ikastola ! •